Չորեքշաբթի Իսրայելի կառավարությունը պառակտվել է այն հարցում, թե արդյոք Իսրայելը պե՞տք է մասնակցի Գազայի հատվածի կառավարմանը պաղեստինյան զինյալների դեմ պայքարի ավարտից հետո:
Ըստ իսրայելական լրատվամիջոցների՝ պաշտպանության նախարար Գալանտը հայտարարել է, որ մտադիր չէ ՀԱՄԱՍ-ի ոչնչացումից հետո թույլատրել «Իսրայելական քաղաքացիական կամ ռազմական վարչակազմի ներկայությունը Գազայում»։
«Մենք պետք է վերացնենք այն գործիքները, որոնցով ՀԱՄԱՍ-ը վերահսկում է Գազայի հատվածը, իսկ դրա համար պահանջվում են ինչպես ռազմական գործողություններ, այնպես էլ կառավարման այլընտրանքային՝ պաղեստինյան, կառույցների կազմակերպում»,- ասել է Գալանտը:
Նման դիրքորոշումն առաջացրել է Իսրայելի վարչապետ Բենիամին Նեթանյահուի դժգոհությունը։ Դեռևս Գալանտի հայտարարությունից առաջ կառավարության ղեկավարը հայտարարել էր, որ մտադիր չէ մտածել Գազայի ապագայի մասին, քանի դեռ ՀԱՄԱՍ-ը գոյություն ունի: Ավելի ուշ Նեթանյահուն ընդգծել է, որ ճիշտ չի համարում Գազայի հատվածի կառավարման փոխանցումը Մահմուդ Աբասի գլխավորած ՖԱԹՀ շարժմանը:
Վարչապետ Նեթանյահուի դիրքորոշումը պաշտպանել են Ազգային անվտանգության նախարար Իտամար Բեն Գվիրը և ֆինանսների նախարար Բեզալել Սմոտրիչը։
Սակայն իսրայելական կառավարությունում ոչ բոլորն են դեմ պաշտպանության նախարարին: Նրան իր աջակցությունն է հայտնել Իսրայելի ռազմական կաբինետի անդամ Բենի Գանցը:
Միաժամանակ Իսրայելի պաշտպանության բանակը շարունակում է գործողությունները Գազայում, մասնավորապես՝ Ռաֆահում։
