Սանկտ Պետերբուրգի Օկտյաբրսկի շրջանային դատարանը երկարացրել է «ադրբեջանական մաֆիայի» ղեկավար Թուրալ Մամեդովի նկատմամբ խափանման միջոց կալանավորումը։ Այս մասին հայտնում է Սանկտ Պետերբուրգի դատարանների միասնական մամուլի ծառայության Telegram ալիքը։
«Հետաքննությունը ցույց է տվել, որ Մամեդովը մեղադրվում է առանձնահատուկ ցինիզմով հանդուգն հանցագործություններ կատարելու մեջ», - ասվում է հաղորդագրությունում։
Նշվում է, որ Մամեդովը և նրա պաշտպանությունը դեմ են արտահայտվել խափանման միջոցի երկարաձգմանը և տնային կալանք են խնդրել։ Մեղադրյալը պնդել է, որ թաքնվելու մտադրություն չի ունեցել։
Հիշեցնենք, որ դեկտեմբերի 22-ին հայտնի է դարձել, որ «ադրբեջանական մաֆիայի» ղեկավարը տեղափոխվել է Սանկտ Պետերբուրգ։ Մինչ այս երիտասարդը թաքնվում էր Ադրբեջանում, սակայն երկիրը հետագայում նրան արտահանձնել է Ռուսաստանին։
Մամեդովը և ևս 15 մարդ բերման են ենթարկվել անցորդներին ծեծի ենթարկելուց հետո։ Իրավապահների տվյալներով՝ երիտասարդները հարձակվել են սլավոնական արտաքինով ռուսների վրա, որից հետո տեսանյութեր են տեղադրել Telegram ալիքում, որի ադմինիստրատորը Մամեդովն է։
Քննիչները կարծում են նաև, որ երիտասարդը հրապարակավ կոչ է արել բռնություն կիրառել անցորդների նկատմամբ։ Մամեդովին սպառնում է քրեական պատասխանատվություն մի քանի հոդվածներով, այդ թվում՝ ատելություն և թշնամություն հրահրելուն ուղղված հրապարակային գործողությունների համար:
