Մոլդովայում նախագահի թեկնածու Մայա Սանդուն դիմել է ընտրողներին և հայտարարել Մոլդովայում ազատության վրա «աննախադեպ հարձակման» մասին: Նա դժգոհել է դատական համակարգից և կոչ արել պետական մարմիններին ապահովել ընտրական գործընթացի ամբողջականությունը, հաղորդում է Newsmaker-ը:
«Պետական մարմինները հայտնաբերել և փաստաթղթավորել են ձայներ գնելու համար կատարված բանկային վճարումները: Սա լրջորեն խեղաթյուրել է ընտրությունների արդյունքները»,- պնդում է Սանդուն։
Նախագահի թեկնածուն դժգոհել է դատական համակարգից, որը «չի կարողացել ավարտել կոռուպցիոն գործերը»։ «Ամբողջ ժողովուրդը գիտի, բայց նրանք պարզապես չգիտեն, թե ինչ կար պայուսակի մեջ, որը Դոդոնը ստացել է Պլախոտնյուկից: Նրանք չգիտեն, թե ով է միլիարդը գողացել Մոլդովայի քաղաքացիներից: Մոլդովայի արդարադատությունը չի նկատել, թե ինչպես Իլան Շորը հաղթեց Օրհեյում, Գագաուզիայում և այլ բնակավայրերում կայացած ընտրություններում։ Առանց գնված ձայների արդյունքն այլ կլիներ»,- ասել է Մայա Սանդուն։
Նրա խոսքով՝ պետական կառույցները իրեն որպես նախագահ տեղեկացրել են «քվե գնելու հսկայական ցանցի» մասին։ «Ինձ հարցրեցին, թե դա պատճառ չէ՞ տեղի ունեցած ընտրությունները չճանաչելու և կրկակի ընտրություններ կազմակերպելու համար։ Սակայն ընտրական գործընթացը չի կարելի կասեցնել միայն մեկ էական պատճառով»,- ասաց նախագահի թեկնածուն։
Մայա Սանդուն խոսել է ժողովրդի «հերոսական ջանքերի» մասին։ «Քաղաքացիական այս հերոսական արարքը չի կարելի չեղարկել կամ արատավորվել որևէ կեղծիքով։ Երկրորդ փուլում հույսը դնում ենք միայն ժողովրդի վրա։ Մենք հույս ունենք մարդկանց մոբիլիզացիայի վրա, որոնք տեսնում են, որ երկիրը շրջափակման մեջ է, որ մեզ համար տրոյական ձի են պատրաստել։ Ես կոչ եմ անում պետական մարմիններին ապահովել ընտրական գործընթացի ամբողջականությունը, հրապարակայնացնել կեղծիքի ապացույցները և պատժել ձայների գնման համար պատասխանատուներին: Եթե դատական համակարգը նույնիսկ հիմա չարթնանա, Մոլդովայի ապագան տասնյակ տարիներ վտանգի տակ կլինի»,- զգուշացրել է Սանդուն։
