Նավերից ոչ մեկը, որն ըստ ուկրաինական կողմի՝ վնասվել կամ ոչնչացվել է անցած տարվա ընթացքում, չի մասնակցել Ռուսաստանի ռազմածովային ուժերի օրվան նվիրված ռազմածովային շքերթին: Դրա մասին գրում է BBC-ի ռուսական ծառայությունը։
BBC-ն հիշեցնում է, որ 2022 թվականից ի վեր ուկրաինացի զինվորականները հարձակվել են ավելի քան 20 ռուսական նավերի և օժանդակ նավերի վրա, որոնցից առնվազն յոթը, ենթադրաբար ոչնչացվել են։ Լրագրողների հաշվարկներով՝ միայն 2023 թվականի օգոստոսից ի վեր 11 նավ հարձակման են ենթարկվել։
2024 թվականին եթերում շքերթներ են ցուցադրվել Սանկտ Պետերբուրգում, Բալտիյսկում, Վլադիվոստոկում, Սեվերոմորսկում, Կասպիյսկում և Սիրիայում՝ Տարտուսի ռուսական ռազմաբազայում։ Ինչպես ավելի վաղ հայտնել էր «Фонтанка»-ն, Կրոնշտադտում ութ տարվա ընթացքում շքերթի ռազմածովային մասը առաջին անգամ չեղարկվել է։ Այս տարի շքերթը կանցկացվի կրճատված ձևաչափով, և այն նավերը, որոնք արդեն ժամանել են Կրոնշտադտ, վերադարձել են Հյուսիսային նավատորմ։
Սանկտ Պետերբուրգում անցկացված Գլխավոր ռազմածովային շքերթի հեռարձակման ժամանակ ցուցադրվել են Սևծովյան նավատորմի միայն երկու նավ, պնդում է BBC-ն։ Դրանք էին 2024 թվականից Տարտուսի ռուսական բազայում առաջադրանքներ կատարող «Մերկուրի» հետախուզական ռազմանավն ու «Ադմիրալ Գրիգորովիչ» եռակայմ հետախուզանավը։ Սևծովյան նավատորմը երկու անգամ հիշատակվել է նավատորմի հրամանատարների զեկույցներում։
Հաղորդավարը հեռարձակման ժամանակ հայտարարել է, թե Սևծովյան նավատորմի ստորաբաժանումների և կազմավորումների զինվորականները «ներկա պահին մարտական հերթապահություն են անում Ռուսաստանի հարավային սահմանները պաշտպանելու և հատուկ ռազմական գործողության ընթացքում առաջադրանքներ կատարելու համար»։
