Ռուսաստանի և Չինաստանի առաջնորդներ Վլադիմիր Պուտինը և Սի Ծինփինը սեպտեմբերին պատմական նշանակություն ունեցող հանդիպում կունենան, որը հզոր խթան կհաղորդի երկրների միջև կապերին, TASS-ին տված հարցազրույցում ասել է Մոսկվայում Չինաստանի դեսպան Չժան Հանհուեյը։
«Սեպտեմբերին, այս ոսկե աշնանային շրջանում, Պեկինում կկայանա հանդիսավոր հանդիպում, որը նվիրված կլինի ճապոնական ագրեսիայի դեմ Չինաստանի ժողովրդի դիմադրության պատերազմում տարած հաղթանակի 80-ամյակին և Համաշխարհային հակաֆաշիստական պատերազմում տարած հաղթանակի 80-ամյակին», - ասել է նա։ «Չինաստանի և Ռուսաստանի ղեկավարները կրկին կարևոր, պատմական նշանակություն ունեցող հանդիպում կունենան, որը կորոշի երկկողմ հարաբերությունների հետագա զարգացման ուղղությունը և նոր, հզոր խթան կհանդիսանա բոլոր ոլորտներում համագործակցության խորացման համար»։
Դեսպանն ուշադրություն է հրավիրել այն հանգամանքի վրա, որ Չինաստանն ու Ռուսաստանը բարի հարևաններ են, «որոնք կապված են ընդհանուր գետերով ու լեռներով, ժամանակով փորձված իսկական ընկերներ են, որոնք միշտ միմյանց դիտարկում են որպես համագործակցության առաջնահերթ գործընկերներ»։ «Ռուս-չինական հարաբերությունները հիմնված են երկու երկրների հիմնարար շահերի և ընդհանուր կարիքների վրա, ունեն հստակ պատմական տրամաբանություն և հզոր ներքին շարժիչ ուժեր», - ավելացրել է նա։ «Դրանք ամենակայուն, հասուն և ամենամեծ ռազմավարական արժեքն ունեցող հարաբերություններից են՝ ժամանակակից աշխարհի մեծ տերությունների միջև»։
