Ռուսաստանի տարածքի խորքին հարվածներ հասցնելու թույլտվությունը նշանակում է լարվածության նոր փուլ, լրագրողներին ասել է ՌԴ նախագահի մամուլի քարտուղար Դմիտրի Պեսկովը։ Այս մասին գրում է ՌԻԱ «Նովոստի»-ն:
«Եթե նման որոշում իսկապես ձևակերպվել և փոխանցվել է Կիևի վարչակարգին, ապա, իհարկե, սա լարվածության որակապես նոր փուլ է և որակապես նոր իրավիճակ այս հակամարտությունում ԱՄՆ-ի ներգրավվածության առումով»,- ասել է Պեսկովը՝ ընդգծելով, որ արևմտյան թերթերում արված հրապարակումներն այս մասին նշում են՝ չվկայակոչելով որևէ պաշտոնական աղբյուր։
ՌԴ նախագահի մամուլի քարտուղարն ընդգծել է, որ ռուսական տարածքի խորքին հարվածներ կհասցնի ոչ թե Ուկրաինան, այլ այն երկրները, որոնք դրա թույլտվությունը կտան, և դա էապես փոխում է իրավիճակը։
«Թիրախավորումը և մյուս գործողությունները չեն իրականացնում ուկրաինացի զինվորականները, դա անում են արևմտյան երկրների ռազմական մասնագետները, ինչը արմատապես փոխում է ուկրաինական հակամարտությունում նրանց ներգրավվածության ձևը», - ասել է Պեսկովը:
Հիշեցնենք, որ ամերիկյան մի շարք առաջատար լրատվամիջոցներ՝ New York Times-ը, Washington Post, Axios-ը, հայտել են, որ ԱՄՆ-ն Ուկրաինային թույլ է տվել իր տրամադրած հեռահառ հրթիռներով հարվածել ՌԴ տարածքի խորքին, ինչի մասին վերջին ամիսներին Կիևն անընդհատ խնդրում էր Վաշինգտոնին:
Առաջինն այդ մասին գրել է New York Times-ը՝ պնդելով, որ խոսքը ATACMS մարտավարական բալիստիկ հրթիռների մասին է:
Տեղեկությունը պաշտոնապես չի հաստատվել. ԱՄՆ նախագահ Ջո Բայդենը հրաժարվել է պատասխանել Ռուսաստանի տարածքում ամերիկյան հեռահար զինատեսակներով հարվածներ հասցնելու թույլտվության մասին հարցին։
Մինչդեռ Ուկրաինայի նախագահ Վլադիմիր Զելենսկին այս առնչությամբ ասել է.«Խաղաղության ծրագրի գլխավոր կետերից մեկը մեր բանակի հեռահարությունն է: Այսօր լրատվամիջոցներից շատերն ասում են, որ մենք հակահարված տալու թույլտվություն ենք ստացել, բայց հարվածները խոսքերով չեն հասցվում։ Նման բաների մասին նախապես չեն հայտարարում։ Հրթիռներն իրենք իրենց մասին կխոսեն։ Միանշանակ»։
Տեղեկության տարածումից հետո Le Figaro-ն գրել է, որ Ֆրանսիան և Մեծ Բրիտանիան նույնպես թույլ են տվել հեռահար զենքերով հարվածներ հասցնել Ռուսաստանի տարածքի խորքին:
Reuters-ը պնդում է, որ Ռուսաստանի Դաշնություն խորը հարվածներ կարող են իրականացվել առաջիկա օրերին:
ԱՄՆ նորընտիր նախագահ Դոնալդ Թրամփի որդին՝ Դոնալդ Թրամփ կրտսերը, որոշման պատասխանատուներին «իմբեցիլ» է անվանել:
Պենտագոնը չի մեկնաբանել Ռուսաստանի տարածքին ԱՄՆ-ի զենքով հարվածներ հասցնելու որոշումը:
