ՌԴ նախագահը չի մեկնի Իտալիա՝ ՆԱՏՕ-ի անդամ երկիր, «անվտանգության նկատառումներով», ինչպես նաև այն պատճառով, որ Ռուսաստանը Վատիկանին հակամարտությունում չեզոք կողմ չի համարում, հաղորդում է Bloomberg-ը՝ հղում անելով ռուսաստանցի պաշտոնյաներին։
Բացի այդ, բանակցություններին Վատիկանի մասնակցությունը «թերահավատություն» է առաջացնում նաև Ռուս ուղղափառ եկեղեցու մոտ, որը Սուրբ Աթոռը դիտարկում է որպես «պատմական մրցակից» Ուկրաինայում, հաղորդում է DW-ն։
Մոսկվային ավելի շատ ձեռնտու է Թուրքիան՝ որպես խաղաղության ապագա համաձայնագրի պայմանների քննարկման հարթակ։ Միևնույն ժամանակ, ռուսաստանյան «Известия» թերթը գրում է, որ ՌԴ ԱԳՆ-ն չի բացառում Ուկրաինայի հետ բանակցությունների հաջորդ փուլի անցկացումը Վատիկանում։
Ավելի վաղ ԱՄՆ նախագահ Դոնալդ Թրամփը Պուտինի հետ հեռախոսազրույցից հետո եվրոպացի առաջնորդներին հայտնել էր, որ ՌԴ նախագահը մտադիր չէ ավարտել պատերազմն Ուկրաինայում, քանի որ կարծում է, որ հաղթում է դրանում, հաղորդել էր The Wall Street Journal թերթը՝ հղում անելով իր աղբյուրներին։
