Ռուսաստանը շարունակում է հետաքրքրված լինել Հարավային Կովկասի վերաբերյալ «3+3» ձևաչափով շփումների շարունակմամբ և հույս ունի, որ հարթակի լիարժեք աշխատանքը հնարավորինս շուտ կվերսկսվի։ Այդ մասին ՏԱՍՍ-ին տված հարցազրույցում հայտարարել է ՌԴ ԱԳՆ ԱՊՀ երկրների չորրորդ դեպարտամենտի տնօրեն Միխայիլ Կալուգինը։
Նա նշել է, որ «3+3» ձևաչափը, որի մեջ մտնում են Ադրբեջանը, Հայաստանը, Վրաստանը, ինչպես նաև Ռուսաստանը, Իրանը և Թուրքիան, ծառայում է որպես «հարավկովկասյան պետությունների և նրանց անմիջական հարևանների միջև համագործակցության հաստատման կարևոր գործիք՝ «տարածաշրջանային պատասխանատվության» սկզբունքի հիման վրա»։ Միևնույն ժամանակ Կալուգինը ուշադրություն է հրավիրել այն բանի վրա, որ մի շարք օբյեկտիվ պատճառներով, որոնցից մեկն Իրանի շուրջ ստեղծված իրավիճակն է, «3+3» ձևաչափով հերթական նախարարական հանդիպման կազմակերպման շուրջ «որոշակի դադար է առաջացել»։
«Սակայն շփումները շարունակելու շահագրգռվածությունը պահպանվում է։ Ակնկալում ենք, որ հարթակի լիարժեք աշխատանքը հնարավորինս շուտ կվերսկսվի», — ընդգծել է ԱՊՀ երկրների չորրորդ դեպարտամենտի տնօրենը։
Դիվանագետը պարզաբանել է, որ տարածաշրջանային պատասխանատվության սկզբունքը ենթադրում է «փոխշահավետ և հեռանկարային նախագծերի համաձայնեցում, որոնք համապատասխանում են տարածաշրջանի բոլոր դերակատարների շահերին, որոշումները կայացվում են առանց արտաքին ճնշման, առանց կողմնակի ուժերի կողմից պարտադրված «օրակարգի»»։
Անվտանգություն՝ առանց բաժանարար գծերի կառուցման
«Խոսքն այն մասին է, որ չպետք է կառուցել բաժանարար գծեր, չպետք է աշխատել ի վնաս տարածաշրջանի որևէ երկրի։ Միայն նման հիմքի վրա է հնարավոր իրականում ապահովել անվտանգությունն ու տնտեսական բարգավաճումը, Հարավային Կովկասում իսկական և երկարաժամկետ խաղաղությունը», — պարզաբանել է նա։
Կալուգինը նաև հիշեցրել է, որ «3+3» հարթակի հիմնադիր հանդիպումը տեղի է ունեցել Մոսկվայում 2021 թվականի դեկտեմբերին, իսկ տվյալ ձևաչափի նախաձեռնողները եղել են Ադրբեջանն ու Թուրքիան։ «2023 թվականի հոկտեմբերին արտաքին գործերի նախարարները համատեղ նիստ են անցկացրել Թեհրանում, — շարունակել է նա։ — 2024 թվականի հոկտեմբերին Ստամբուլում տեղի ունեցած նախարարական հանդիպման ժամանակ պայմանավորվածություն է ձեռք բերվել սկսել քննարկել փոխգործակցության կոնկրետ հարցերը տրանսպորտի, էներգետիկայի և մշակույթի ոլորտներում»։
Այս կապակցությամբ ԱՊՀ երկրների չորրորդ դեպարտամենտի տնօրենը նշել է, որ այսօր ակտիվ նախապատրաստություն է ընթանում փորձագիտական «ճանապարհային քարտեզի» գործարկման համար՝ «3+3»-ի գործունեության մեջ առանցքային և խնդրահարույց հարցերի քննարկման նպատակով՝ մասնակից երկրների առաջատար քաղաքագետների մասնակցությամբ, ներառյալ Վրաստանը»։
