Ռուսաստանի և Չինաստանի ռազմավարական հարաբերությունները գտնվում են զարգացման աննախադեպ մակարդակի վրա։ Այս մասին նոյեմբերի 19-ին Ռիո դե Ժանեյրոյում ընթացող «Քսանյակի» (G20) գագաթնաժողովի շրջանակում Չինաստանի արտգործնախարար Վան Իի հետ հանդիպման ժամանակ հայտարարել է ՌԴ արտգործնախարար Սերգեյ Լավրովը։
«Մենք իսկապես գտնվում ենք համապարփակ գործընկերության մեր ռազմավարական հարաբերությունների զարգացման աննախադեպ փուլում, և դա հաստատվում է նախագահ (ՌԴ Վլադիմիր) Պուտինի և նախագահ (ՉԺՀ) Սի Ցզինպինի կանոնավոր շփումներով»,- ասել է Լավրովը, հաղորդում է «Իզվեստիան»։
Նա պարզաբանել է, որ երկրների հարաբերությունների մոդելը շատ գրավիչ է այլ համախոհ պետությունների համար, և դա դրսևորվում է ԲՐԻԿՍ-ի գործունեության մեջ։
Լավրովը նաև նշել է, որ ցանկանում է համատեղ աշխատել Չինաստանի հետ ԲՐԻԿՍ-ից բացի այլ հարթակներում։
«Մենք կասկած չունենք, որ մենք կշարունակենք նույնքան հաջող գործել բոլոր մյուս հարթակներում, ներառյալ ՇՀԿ-ն, որտեղ Չինաստանը նախագահում է, ինչպես նաև G20-ում, ԱԽՏԽ-ում և, իհարկե, ՄԱԿ-ում և նրա անվտանգության խորհուրդում»,- հայտարարել է ՌԴ ԱԳՆ ղեկավարը։
Ռուսաստանի արտաքին գործերի նախարարությունը հայտնել է, որ հանդիպմանը հատուկ ուշադրություն է դարձվել ամենաբարձր մակարդակով ձեռք բերված պայմանավորվածությունների կատարման առաջընթացին, այդ թվում՝ Կազանում կայանալիք ԲՐԻԿՍ-ի գագաթնաժողովի ժամանակ։
