ԱՄՆ Հետաքննությունների դաշնային բյուրոյի (ՀԴԲ) տնօրեն Քեշ Փաթելը հայտարարել է գերատեսչության աշխատակիցների ազատումների մասին՝ ՀԴԲ-ի նախկին ղեկավարության կողմից Կոնգրեսի անդամների նկատմամբ հսկողության վերաբերյալ հաղորդումների պատճառով։ Այս մասին նա գրել է X սոցիալական հարթակում։
«Թափանցիկությունը կարևոր է, իսկ հաշվետու լինելը՝ չափազանց կարևոր։ Մենք խոստացել ենք անել երկուսն էլ, և խոստումներն այսպիսի տեսք ունեն։ Այս ՀԴԲ-ն կատարում է խոստումները։ Նախկին ղեկավարության ՀԴԲ-ի թիմի կողմից Կոնգրեսի անդամների նկատմամբ չհիմնավորված հսկողության վերաբերյալ մեր վերջին բացահայտումների արդյունքում մենք արդեն ձեռնարկել ենք հետևյալ գործողությունները. ազատել ենք աշխատակիցների, վերացրել ենք զենքի վերածված CR-15 ջոկատը և սկսել հետաքննություն, որի շրջանակներում կձեռնարկվեն պատասխանատվության ենթարկելու լրացուցիչ միջոցներ», - գրել է պաշտոնյան։
CR-15 ջոկատը, որը զբաղվում էր 2021 թ. հունվարին Կապիտոլիումի վրա գրոհի գործի հետաքննությամբ, լուծարվել է մայիսին։
Ավելի վաղ Fox News հեռուստաալիքը, վկայակոչելով իր տրամադրության տակ հայտնված ՀԴԲ-ի փաստաթղթերից մեկը, հայտնել էր, որ ԱՄՆ նախկին հատուկ դատախազ Ջեք Սմիթը, որն աշխատել է 2021 թվականին Կոնգրեսի շենքի վրա գրոհի գործով, հետևել է հանրապետական սենատորների անձնական նամակագրություններին և հեռախոսազանգերին։ Ըստ հեռուստաալիքի տեղեկատվության՝ Սմիթը և նրա ենթակաները կարողացել են 2023 թվականին հասանելիություն ստանալ պաշտոնյաների հեռախոսային տվյալներին, երբ ԱՄՆ նախագահի պաշտոնը զբաղեցնում էր Ջո Բայդենը։
