Թայվանում «Պոդուլ» թայֆունը՝ մինչև 191 կմ/ժ քամու արագությամբ, հարվածել է նոսր բնակեցված հարավարևելյան ափին։ Այս մասին հայտնում է Reuters-ը։
Կղզու հարավային և արևելյան մասերի մեծ մասը փակվել է, և հարյուրավոր չվերթեր չեղարկվել են։
Թայվանի Կենտրոնական օդերևութաբանական վարչությունը հայտնել է, որ «Պոդուլ»-ը հարվածել է հարավարևելյան Թայթունգ քաղաքին տեղական ժամանակով մոտավորապես ժամը 13:00-ին:
«Սպասվում են թայֆունի ավերիչ քամիներ: Հնարավորինս շուտ ապաստան փնտրեք»,- նշվել է օգոստոսի 13-ի առավոտյան Թայթունգի որոշ հատվածներում բջջային հեռախոսների օգտատերերին ուղարկված հաղորդագրության մեջ:
Ինը քաղաքներ և շրջաններ հայտարարել են աշխատանքի և դպրոցական պարապմունքների դադարեցման մասին։
Կառավարությունը հայտարարել է, որ թայֆունից առաջ տարհանվել է ավելի քան 5500 մարդ։
Տրանսպորտի նախարարությունը հայտնել է, որ օգոստոսի 13-ին չեղարկվել են բոլոր ներքին՝ ընդհանուր առմամբ 252 չվերթերը, ինչպես նաև 129 միջազգային չվերթեր։
Թայվանին հաճախ են թայֆուններ պատուհասում, հիմնականում խաղաղօվկիանոսյան լեռնային արևելյան ափի երկայնքով։
