ԱՄՆ պատերազմի նախարարությունը պատրաստվում է Կոնգրեսից 50 միլիարդ դոլար խնդրել՝ արդեն այս տարի հարյուր հազարավոր անօդաչու համակարգերի զանգվածային արտադրության և զինված ուժերում լայնածավալ ներդրման համար։ Defense News-ը հաղորդում է, որ այս մասին Պենտագոնի ղեկավար Փիթ Հեգսեթը հայտարարել է Վաշինգտոնում ԱՄՆ բանակի ասոցիացիայի (AUSA) ամենամյա ժողովում իր ելույթում։
Հեգսեթն այս ֆինանսավորումը բնութագրել է որպես միանվագ ներդրում, այլ ոչ թե որպես կանոնավոր տարեկան հատկացում։
«Ի վերջո, արդեն այս տարի խոսք կլինի հարյուր հազարավոր միանգամյա օգտագործման հարվածային անօդաչունների մասին, իսկ առաջիկա տարիներին՝ միլիոնների։ Մեր գերատեսչությունը երբեք նման տեմպեր չի տեսել», - ընդգծել է Պենտագոնի ղեկավարը։
Նշված 50 միլիարդ դոլարը չի մտնում Պենտագոնի 2027 ֆինանսական տարվա բյուջեի մեջ, որը ներառում է 53,6 միլիարդ դոլար «Անօդաչուների գերակայություն» նախաձեռնության համար։
ԱՄՆ պատերազմի նախարարի խոսքով՝ անհրաժեշտ է, որ Պենտագոնը դյուրացնի նոր ընկերությունների մուտքը պաշտպանական շուկա, որտեղ երկար ժամանակ գերիշխել են խոշոր, վաղուց հաստատված կապալառուներն ու թանկարժեք հարթակները։ Հեգսեթի խոսքով՝ ավանդական պաշտպանական ձեռնարկություններն առաջվա պես կարևոր են, սակայն գերատեսչությանը նաև անհրաժեշտ են ավելի էժան համակարգեր, որոնք կարելի է արտադրել զանգվածային ծավալներով։
