Մերձավոր Արևելքում տեղակայված ամերիկյան զորքերը վերջին շաբաթվա ընթացքում ենթարկվել են 14 հարձակումների՝ անօդաչու թռչող սարքերի և հրթիռների կիրառմամբ, ինչի հետևանքով տուժել է 24 մարդ:
ԱՄՆ պաշտպանության նախարարության խոսնակ, Ռազմաօդային ուժերի բրիգադի գեներալ Փեթ Ռայդերը հաստատել է, որ Իրաքում զորքերը հոկտեմբերի 17-ից 24-ը 11 անգամ հարձակման են ենթարկվել, մինչդեռ Սիրիայում գտնվող զորքերը նույն ժամանակահատվածում երեք անգամ են հարձակման ենթարկվել:
Պենտագոնի պաշտոնյաներն ավելի վաղ պնդում էին, որ Իրանն է կանգնած ամերիկյան զորքերի վրա կատարված բոլոր հարձակումների հետևում, թեև ներկայումս որևէ ապացույց չկա, որ այդ երկրի ղեկավարությունն է տվել հարձակումների հրամանը:
Նախօրեին հրթիռ է արձակվել Իրաքի Ալ-Ասադ ավիաբազայի ուղղությամբ։ Այն կասեցվել է, վիրավորների, զոհերի կամ բազայի ավերածությունների մասին չի հաղորդվում: Նույն բազան, որը գտնվում է Բաղդադից արեւմուտք, հարձակման է ենթարկվել հոկտեմբերի 18-ին։ Հարձակման հետևանքով տուժել է չորս մարդ և որոշակի վնաս է հասցվել բազային։
Նույն օրը հարձակումներ են տեղի ունեցել Էրբիլի մերձակայքում գտնվող «Ալ-Հարիր» ավիաբազայի և Սիրիայի Ալ-Թանֆ կայազորի վրա։ Առաջին միջադեպից տուժածներ չկան, սակայն երկրորդի ժամանակ տուժել է 20 ամերիկացի զինվորական։
Հոկտեմբերի 19-ին ամերիկյան «Քարնի» ռազմանավը գտնվել է Կարմիր ծովի հյուսիսում, երբ այն խոցել են Եմենում հութի ուժերի կողմից արձակված 4 ցամաքային հարվածային թեւավոր հրթիռներ և 15 անօդաչու թռչող սարքեր:
Այդ օրը լրացուցիչ հարձակումներ են տեղի ունեցել Բաղդադի դիվանագիտական աջակցության կենտրոնում, Բաղդադի միջազգային օդանավակայանի մոտ և Եփրատում գտնվող առաքելության աջակցության հաստատության վրա՝ Սիրիայի հյուսիս-արևելքում: Բացի այդ, հոկտեմբերի 20-ին հարձակում է եղել Ալ-Հարիր ավիաբազայի վրա, իսկ հոկտեմբերի 23-ին՝ Սիրիայի Ալ-Թանֆ կայազորի դեմ:
