Ժողովրդավարության բաստիոնում 2021 թվականից առ այսօր վանաձորցիները չեն կարողացել իրացնել սահմանադրությամբ իրենց տրված իրավունքը, ունենալ իրենց նախընտրած կուսակցության ներկայացուցչին, որպես համայնքի ղեկավար, որովհետև Էդմոն Մարուքյան «Լուսավոր Հայաստանի» ուղղակի աջակցությամբ կասեցվել է համայնքի ղեկավարի ընտրության օրակարգով ավագանու նիստը: Այս մասին այսօր՝ ապրիլի 15-ին, ԱԺ-ում հայտարարությունների ժամին իր ելույթում նշեց «Հայաստան» խմբակցության պատգամավոր Արմենուհի Կյուրեղյանը:
«ՔՊ-ն ԱԺ-ի իր մեծամասնությամբ վարչապետին տվել է սահմանադրյամբ չնախատեսված լիազորություն, և նա էլ համայնքի ղեկավարի ԺՊ է նշանակել մեկին, ով համայնքի բնակիչների կողմից շատ քիչ ձայն էր ստացել և այդպես արդեն մի քանի տարի։ Իսկ համայնքի ղեկավարի ընտրության օրակարգով ավագանու նիստի կայացման արգելանքը հանելու հարցով դատական նիստը, որ նշանակված էր ապրիլի 9-ին, նորից հետաձգվեց դատավորի զբաղվածության պատճառով։ Դե բա ժողովրդավարությունն էլ ո՞նց է լինում, ի՞նչ համայնքի ղեկավարի ընտրություն, եթե դատավորը զբաղված է։ Իսկ միգուցե պատճառներն ա՞յլ էին»,-ասաց նա:
Անդրադառնալով Գյումրում եւ Փարաքարում վերջերս կայացած արտահերթ ընտրություններին, Կյուրեղյանն ասաց. «Մարտի 30-ին Գյումրիում և Փարաքարում կայացան ՏԻՄ արտահերթ ընտրություններ: Ինչո՞ւ արտահերթ, որովհետև օրվա իշխանությունը, անտեսելով քաղաքացիներին նախորդ ընտրությունների արդյունքները, ԺՊ-ների դեմքով զավթել էր ՏԻՄ-ը, ինչպես Վանաձորում։ Թե՛ Փարաքարում և թե՛ Գյումրիում մեր հայրենակիցները կատարեցին իրենց ընտրությունը և նորից մերժեցին ՔՊ-ին։ Այս անգամ ՔՊ պարտությունը բոլորովին այլ մակարդակ ունեցավ և հենց սա էլ վախեցրեց ՔՊ-ին։ ՔՊ-ին չփրկեց ոչ վարչական ռեսուրսի անսահման օգտագործումը, ոչ ընդդիմադիր թեկնածուների դեմ բռնաճշիռումների կիրառումը, ոչ վախի մթնոլորտում ընտրողների ուղղորդումը, ոչ էլ բարձրաստիճան ՔՊ պաշտոնյաներին այդ համայնքներ գործուղելը։
Գյումրեցիների և Փարաքարի բնակիչների մերժումը ՔՊ-ին ապացուցեց հետևյալը. Հանրությունը երբեք ասֆալտը չի գերադասի հայրենիքից։ Հանրությունը մերժում է որպես ժողովրդի կամք ներկայացվող ԵՄ-ին միանալու գործընթացի անհրաժեշտությունը, Եվրաքվեի հավաքած ձայները վկա։
Նիկոլիզմի կողմից անընդհատ օգտագործվող նախկինների վերադարձով վախեցնելու թեզը այլևս չի աշխատում։ ՔՊ-ին աջակցող ոչ մի այլ ուժ չարժանացավ ընտրողների գոնե մեկ մանդատի։ Հանրությունը մերժում է թուրք-ադրբեջանական տանդեմին ամեն օր մի նոր զիջում անող, օրեցօր աճող նրանց ախորժակը բավարարող Նիկոլիզմը։
Ընդդիմության մեջ սեպ խրելու ցանկացած փորձ տապալվում է, եթե հարցը վերաբերվում է օրվա իշխանություններին հեռացնելուն»,- հայտարարեց ընդդիմադիր պատգամավորը:
Վերջում նա շնորհավորեց Փարաքարում և Գյումրիում ՔՊ-ին հաղթանակ տարած կուսակցություններին ու դաշինքներին. «ՔՊ-ի մերժումը շարունակվում ու խորանում է, այդպես էլ լինելու է»,- ընդգծեց նա:
