Իսրայելի վարչապետ Բենյամին Նեթանյահուն սեպտեմբերի 27-ին գաղտնի այց է կատարել Արաբական Միացյալ Էմիրություններ, որտեղ հանդիպել է երկրի նախագահ շեյխ Մոհամեդ բին Զայեդ Ալ Նահյանի հետ. այս մասին հայտնել է իսրայելական «Kan» հեռուստաալիքը։
Այցը տևել է մի քանի ժամ։ Իսրայելի վարչապետի գրասենյակը չի հայտարարել դրա մասին։
Ուղևորության համար Նեթանյահուն օգտագործել է իսրայելցի գործարարին պատկանող մասնավոր ինքնաթիռ, որից օգտվում են նաև այլ բարձրաստիճան պաշտոնյաներ։ Այցը տեղի է ունեցել «Haaretz»-ի հրապարակած տեղեկության շուրջ ծագած աղմուկի ֆոնին, ըստ որի՝ շեյխ բին Զայեդը 2023 թվականի հոկտեմբերի 7-ից կարճ ժամանակ առաջ Նեթանյահուին զգուշացրել էր «Համաս» խմբավորման սպասվող հարձակման մասին։ «Haaretz»-ի տվյալներով՝ Նեթանյահուն այդ տեղեկությունը չի փոխանցել անվտանգության ծառայություններին։
«Haaretz»-ի հրապարակումը համընկել է լրագրողներ Շլոմի Էլդարի և Ռութ Յուվալի՝ «Պատանդներ. անգործության 843 օր» (Hostages: 843 Days of Inaction) գրքի լույսընծայման հետ, որը հիմնված է տասնյակ աղբյուրների վկայությունների վրա։ Նեթանյահուն հերքել է իրեն ուղղված բոլոր մեղադրանքները։ ԱՄԷ-ի պաշտոնյաները չեն մեկնաբանել հրապարակումը։ Իսրայելի ընդդիմության առաջնորդները կրկին մեղադրել են կառավարությանը անփութության մեջ և կոչ արել ստեղծել պետական հանձնաժողով՝ 2023 թվականի հոկտեմբերի 7-ի իրադարձությունները հետաքննելու համար։
