Այսօր Կոտայքի մարզի Եղվարդ քաղաքի վարչական տարածքում գտնվող «Նաիրի շին» բաժնետիրական ընկերության բակում են հավաքվել նշված ընկերության բալանսում գործող մի քանի ընկերությունների աշխատակիցներ, այդ թվում՝ «Ընդերքաբեր» «Նաիրի շին» ՃՇՇ-ի աշխատակիցները:
Բակում հավաքված քաղաքացիները լրատվամիջոցին պատմել են, որ «Նաիրի» ՃՇՇ-ի տնօրեն Յագոր Խերիմյանը պարբերաբար իրենց խաբում է և չի վճարում աշխատավարձը.
«Արդեն մի քանի օր է, համոզվել ենք, որ նա հերթական անգամ փափուկ բարձ է դնում մեր գլխի տակ։ Պատճառաբանում է, որ Կապի և տրանսպորտի նախարարությունը գումարը չի փոխանցել։ Այսօր էլ մեր հեռախոսազանգերին պատասխանեց, որ ինքը գտնվում է Երևանում՝ կապի նախարարությունում, և սպասում է, որպեսզի իրեն նախարար Հակոբ Արշակյանն ընդունի, որի ժամանակ ինքը ներկայացնելու է խնդիրներն ու հետո կվերադառնա և կպատասխանի, հավանաբար, դրական»,– ասել է աշխատողներից մեկը։
Politik.am-ի հետ զրույցում «Նաիրի շին» բաժնետիրական ընկերության գործավար-օպերատորը հայտնեց, որ աշխատավարձերի չվճարման հիմնական պատճառը իրենց հետ համագործակցած ընկերությունների կողմից չփոխանցված վճարումներն են.
«Աշխատակիցները աշխատավարձ չեն ստացել մեկ տարուց ավել: Նախկինում այսպես չի եղել, քանի որ մեզ հետ համագործակցող ընկերությունները միշտ ըստ պատշաճի կատարել են փոխանցումները: Կան ընկերություններ, որոնք մեր կատարած աշխատանքի դիմաց ավելի քան 230 միլիոն դրամի վճարում չեն կատարել, որը հիմք է հանդիսացել աշխատավարձերի չկարգավորման համար: Եղել են նաև դատական պրոցեսներ, չգիտեմ` ինչ են պատասխանել, սակայն փաստն այն է, որ խնդիրը լուծված չէ: Վարչապետին էլ ենք դինել դրություն-նամակով, գործին ընթացք է տվել, բայց դեռ պատասխան չկա»:
Ապրիլ ամսվա կատարողականի գումարն էլ չի վճարվել` պատճառաբանությամբ, թե աշխատանքները թերություններով են կատարվել.
«Դա վերաբերում է տրանսպորտի նախարարությունը: Երբ որոշել են որ մեզ չեն վճարելու, գրություն ենք ուղարկել, որի հիման վրա հանձնաժողով է կազմվել: Նույն կերպ իսպանական ընկերության համար ենք աշխատանքներ կատարել, որը ինչպես պարզվեց`գոյություն չունի: 12 մլն դրամ էլ այդ վճարումը չի կատարվել, ինչից էլ տուժում է աշխատողը»:
