Չինաստանն ու Հնդկաստանը պետք է համատեղ պահպանեն խաղաղությունն ու անդորրը սահմանային գոտիներում, հայտարարել է Չինաստանի պաշտպանության նախարարության խոսնակ Չժան Սյաոգանգը՝ պատասխանելով այս ամսվա սկզբին կայացած Չինաստան-Հնդկաստան սահմանային հարցերով հատուկ ներկայացուցիչների 24-րդ հանդիպման վերաբերյալ հարցին։
Սինհուայի տվյալներով՝ բանակցությունների արդյունքում ձեռք է բերվել 10 կետից բաղկացած կոնսենսուս, որի արդյունքում երկու կողմերը համաձայնել են շարունակել օգտագործել մեխանիզմներ՝ սահմանային իրավիճակը դիվանագիտական և ռազմական ուղիներով վերահսկելու համար։
Խոսնակը նշել է, որ բանակցությունների ընթացքում երկու կողմերը դրական և կառուցողական ձևով անկեղծ և խորը մտքեր են փոխանակել Չինաստան-Հնդկաստան սահմանային հարցերի շուրջ՝ հասնելով մի շարք համաձայնությունների։
Այս տարի լրանում է Չինաստանի և Հնդկաստանի միջև դիվանագիտական հարաբերությունների հաստատման 75-ամյակը։ Այս առումով Չժան Սյաոգանգը շեշտել է, որ երկու կողմերը պետք է ամրապնդեն երկկողմ հարաբերություններում առկա դրական դինամիկան և փնտրեն երկու հարևան երկրների միջև համակեցության ճիշտ ուղին՝ փոխադարձ հարգանքի, փոխադարձ վստահության, խաղաղ համակեցության, ընդհանուր զարգացման և փոխշահավետ համագործակցության սկզբունքների հիման վրա։
