Մեծ Բրիտանիան, Ֆրանսիան, Գերմանիան, Իտալիան, Ճապոնիան և Նիդեռլանդները մարտի 19-ին հայտարարել են, որ պատրաստ են «նպաստել Հորմուզի նեղուցով անվտանգ անցումն ապահովելու համապատասխան ջանքերին»։
Ինչպես տեղեկանում է France 24, երկրների խումբը քննադատել է «Իրանի կողմից Ծոցում անզեն առևտրային նավերի վրա վերջերս կատարված հարձակումները»՝ նշելով, որ «ողջունում է նախապատրաստական պլանավորման մեջ ներգրավված երկրների հանձնառությունը»։
Սակայն Իտալիան, Գերմանիան և Ֆրանսիան մարտի 19-ին ավելի ուշ հստակեցրին, որ խոսքը որևէ անհապաղ ռազմական օգնության մասին չէ, այլ հրադադարից հետո հնարավոր բազմակողմ նախաձեռնության մասին։
Փետրվարի 28-ին Իրանի դեմ ամերիկա-իսրայելական հարվածների և Իրանի պատասխան գրոհների պատճառով Հորմուզի նեղուցով նավարկությունը գրեթե դադարել է։ Սա մեծապես ազդել է նավթի և գազի գների վրա։
23 առևտրային նավ, այդ թվում՝ 10 լցանավ, հայտնել են միջադեպերի կամ հարձակման ենթարկվելու մասին։
Միջազգային ծովային կազմակերպության տվյալներով՝ ստեղծված իրավիճակի պատճառով մոտ 20 000 նավաստի մնացել է նեղուցից արևմուտք գտնվող շուրջ 3200 նավի վրա։
Ֆրանսիայի նախագահ Էմանուել Մակրոնը հայտարարել է, որ պլանավորում է քննարկումներ անցկացնել ՄԱԿ-ի Անվտանգության խորհրդի մշտական անդամների հետ, որպեսզի ՄԱԿ-ի շրջանակում ապահովվի Հորմուզի նեղուցով նավագնացության անվտանգությունը ներկայիս ռազմական գործողությունների ավարտից հետո։
ԱՄՆ նախագահ Դոնալդ Թրամփն ավելի վաղ կոչ էր արել երկրներին և ՆԱՏՕ-ին օգնել վերաբացել Հորմուզի նեղուցը առևտրային նավագնացության համար։ Նա վրդովմունք է հայտնել, որ շատերը հրաժարվել են այս նախաձեռնությունից։
