Ինչպես արդեն նշել ենք, մեր քաղաքացի Սամվել Կարապետյանի հետ կապված իրավիճակը շարունակում է մնալ ռուսական կողմի ուշադրության կենտրոնում, հայտարարել է Ռուսաստանի ԱԳՆ ԱՊՀ երկրների չորրորդ դեպարտամենտի տնօրեն Միխայիլ Կալուգինը:
Նրա խոսքով՝ Ռուսաստանի քաղաքացիների և ռուսական բիզնեսի շահերի պաշտպանությունը միշտ եղել է և կլինի ՌԴ-ի գերակա խնդիրը:
«Չենք ցանկանում, որ Կարապետյանի տարիների ընթացքում իրականացրած բիզնես ձեռնարկությունները՝ թե՛ Հայաստանում, թե՛ Ռուսաստանում, տուժեն։ Երևանում Ռուսաստանի դեսպանատան միջոցով մենք հյուպատոսական մուտք գործելու հնարավորություն ենք ստացել նրա մոտ: Մեր դիվանագետները վերջին անգամ այցելել են նրան դեկտեմբերի սկզբին: Մենք ստանում ենք Կարապետյանի առողջության վերաբերյալ բոլոր անհրաժեշտ տեղեկությունները, այդ թվում՝ նրա փաստաբանների և հարազատների միջոցով: Նա հայտնել է, որ իրեն լավ է զգում և ցուցաբերում է լավատեսություն և մարտական ոգի», - նշել է Կալուգինը։
Նրա խոսքով՝ ՌԴ-ն այս հարցը բարձրացնում է Հանրապետության պաշտոնական ներկայացուցիչների մոտ:
«Մենք ընդգծում ենք, որ Կարապետյանը վեց ամիս է՝ կալանքի տակ է առանց դատարանի որոշման: Մենք հայտնում ենք, որ այս միջավայրում այլ ձեռնարկատերեր սկսել են զգուշորեն գնահատել իրենց նախագծերի հեռանկարները Հայաստանում և կասկածի տակ դնել ներդրումային միջավայրի կայունությունը, որը, դժվար թե կպահպանի երկկողմ առևտրի վերելքի տեմպը», - հայտնել է Կալուգինը։
