Նոր իշխանությունները հաճախ են հայտարարում, որ հայ-ռուսական հարաբերությունները աննախադեպ են: Փաշինյանական հասարակական գործիչներն էլ չեն վարանում հիշեցնել, որ նոր իշխանությունները աննախադեպ լեգիտիմ են ու չեն կարող անվստահելի լինել ՌԴ իշխանությունների համար։
Իրականում Ռուսաստանի Դաշնության իշխանությունները բոլոր հիմքերը ունեն չվստահելու ՀՀ նոր իշխանություններին։ Փաշինյանի կառավարության մեծ մասը վարչապետի գլխավորությամբ մեկ-երկու տարի առաջ ընդգծված հակառուսաստանյան քաղաքականություն էին վարում։ Նրանք ՌԴ իշխանությունների նկատմամբ ատելություն քարոզող հատվածի կորիզն էին կազմում։
Առաջիկայում մենք ծավալուն հոդվածով կներկայացնենք իշխանության բոլոր այն ներկայացուցիչներին, որոնք ժամանակին հակառուսականության առաջամարտիկներ էին, բայց այսօր չեն վարանում խոսել հայ-ռուսական բարեկամության մասին։ Այս անգամ անդրադարձ կկատարենք Փաշինյանի մարզպետներից մեկին, որը ժամանակին ծայրահեղ հակառուս էր։
Խոսքը Արագածոտնի մարզպետ Դավիթ Գևորգյանի մասին է։ Նա ժամանակին Հայաստանում ՌԴ դեսպանատան դիմաց կազմակերպվող բողոքի ակցիաների մասնակից էր։ Դավիթ Գրիգորյանն ու իր ընկերը չորս տարի առաջ դեսպանատան առաջ փորձեցին այրել ՌԴ պետական դրոշը, իսկ երբ ոստիկանները փորձեցին կանխարգելել այն, Գրիգորյանը ՌԴ դրոշը նետեց գետնին և կոշիկները սրբեց վրան։
Այսքանից հետո հետաքրքիր է, թե ինչպես է Դավիթ Գրիգորյանը մաս կազմում մի իշխանության, որը հայ-ռուսական հարաբերությունները աննախադեպ է համարում, իսկ ՌԴ-ն՝ ՀՀ-ի լավագույն բարեկամը։ Հայաստանը անգամ հանուն հայ-ռուսական բարեկամության զորք ուղարկեց Սիրիա, որը քննադատվեց Արևմուտքի կողմից։ Իսկ գու՞ցե Դավիթ Գրիգորյանը ֆիկտիվ էր կոշիկները սրբում ՌԴ պետական դրոշի վրա։
Ի դեպ այս ամենը հետաքրքիր է այն ֆոնին, երբ նոր իշխանության շատ ներկայացուցիչներ դատապարտեցին ՀՅԴ երիտասարդների կողմից Թուրքիայի դրոշն այրելը։
