Լիբանանը հրամայել է Իրանի նորանշանակ դեսպանին լքել երկիրը մինչև մարտի 29-ը: Սա հազվադեպ հանդիպող դիվանագիտական քայլ է՝ ընթացող մարտական գործողությունների և ներքին լարվածության ֆոնին: Այս մասին հայտնում է իսրայելական Ynet լրատվական կայքը։
Լիբանանի ԱԳՆ-ն Իրանի դեսպանատան ներկայացուցչին տեղեկացրել է, որ դեսպան Մոհամմադ Ռեզա Շիբանին հայտարարվել է անցանկալի անձ՝ որպես պատճառ նշելով Իրանի կողմից դիվանագիտական նորմերի խախտումները: Լիբանանը նաև հետ է կանչել Թեհրանում իր դեսպանին՝ խորհրդակցությունների համար:
Շիբանին, ով վերջերս էր ժամանել Լիբանան և սպասում էր պաշտոնական հավատարմագրմանը, նախկինում ծառայել է որպես դեսպան Լիբանանում 2006 թվականի պատերազմի ժամանակ, իսկ ավելի ուշ՝ որպես դեսպան Սիրիայում:
Այս դիվանագիտական քայլն արվում է այն ժամանակ, երբ Լիբանանը բախվում է պատերազմով պայմանավորված աճող մարտահրավերների, այդ թվում՝ զանգվածային տեղահանումների և Իսրայելի պաշտպանության բանակի կողմից հարավային Լիբանանում ու Բեյրութի որոշ հատվածներում տարհանման պարբերական նախազգուշացումների:
