Կուբայի նախագահ Միգել Դիաս-Կանելը պաշտոնական այցով գտնվում է Թեհրանում։ Թեհրանի հյուսիսում գտնվող Սաադաբադ մշակութային համալիրում սկսվել է Իրանի Իսլամական Հանրապետության նախագահ Էբրահիմ Ռայիսիի եւ Դիաս-Կանելի հանդիպումը, տեղեկացրել է ԻՐՆԱ-ն։
Կուբայի նախագահը ծրագրում է մասնավոր բանակցություններ վարել, մասնակցել երկու կողմերի պատվիրակությունների համատեղ հանդիպումներին, ստորագրել մի շարք համաձայնագրեր համագործակցության մասին եւ մասնակցել համատեղ մամուլի ճեպազրույցին։
Սա Կուբայի նախագահի առաջին այցն է Իրան 2001 թվականից ի վեր, երբ երկիր էր այցելել Ֆիդել Կաստրոն։
Մոտ վեց ամիս առաջ նախագահ Ռայիսին այցելել էր Կուբա Լատինական Ամերիկայի երկրներ կատարած տարածաշրջանային շրջագայության ընթացքում։
