Կողմերն ընդգծել են իրենց երկրների ներքին գործերին չմիջամտելու կարևորությունը և պատրաստակամություն են հայտնել համագործակցել տարբեր ոլորտներում

Հեզբոլլահի գլխավոր քարտուղար շեյխ Նայիմ Կասեմն ընդունել է Իրանի Ազգային անվտանգության բարձրագույն խորհրդի քարտուղար Ալի Լարիջանիին և նրան ուղեկցող պատվիրակությանը։ Այս մասին հայտնում է լիբանանյան Elnashra պարբերականը՝ վկայակոչելով «Հեզբոլլահի» մամուլի ծառայությանը։

Հեզբոլլահի գլխավոր քարտուղարը կրկին իր երախտագիտությունն է հայտնել Իրանի Իսլամական Հանրապետությանը Լիբանանին շարունակական աջակցության համար՝ ընդգծելով Լիբանանի և Իրանի ժողովուրդների միջև առկա եղբայրական հարաբերությունները։

Ավելի վաղ Իրանի Իսլամական Հանրապետության Ազգային անվտանգության բարձրագույն խորհրդի քարտուղար Ալի Լարիջանին Բերյութում հանդիպել էր Լիբանանի նախագահ Ջոզեֆ Աունի և խորհրդարանի նախագահ Նաբիհ Բերիի հետ։

Հանդիպումների ընթացքում կողմերն ընդգծել են իրենց երկրների ներքին գործերին չմիջամտելու կարևորությունը և պատրաստակամություն են հայտնել համագործակցել տարբեր ոլորտներում։