Թեհրանում Ալ-Քուդսի օրվան նվիրված զանգվածային երթի ժամանակ պայթյուններ են տեղի ունեցել, որի հետեւանքով զոհվել է մի կին։ Իրանի պետական լրատվամիջոցների հաղորդմամբ՝ նա ծանր վիրավորվել է ավիահարվածի բեկորներից եւ ավելի ուշ մահացել։
Պայթյունները տեղի են ունեցել մայրաքաղաքի գլխավոր փողոցների մոտ, որտեղ հազարավոր մարդիկ ցույցի էին դուրս եկել։ Պայթյուններից հետո երթի մասնակիցները չեն լքել տարածքը, միջոցառումը շարունակվել է։
Իսրայելական ավիահարվածներից մեկն ուղիղ եթերում հայտնվել է այն ժամանակ, երբ Իրանի դատական համակարգի ղեկավարը ելույթ էր ունենում լրագրողների առջեւ։ Պայթյունից հետո նա շարունակել է խոսել լրատվամիջոցների հետ՝ առանց ընդհատելու ելույթը։
Իր հերթին, Israel Defense Forces-ը հաստատել է, որ հարվածներ է հասցրել Իրանի տարածքում: Իսրայելի տվյալներով՝ հարձակումների թիրախներն են եղել Շիրազ, Թեհրան եւ Ահվազ քաղաքները, այդ թվում՝ կենտրոնական օդային պաշտպանության բազան, ինչպես նաեւ զենք, օդային պաշտպանության համակարգեր եւ բալիստիկ հրթիռների բաղադրիչներ արտադրող օբյեկտները։
Իրանի Ազգային անվտանգության գերագույն խորհրդի քարտուղար Ալի Լարիջանին պայթյունի համար մեղադրել է Իսրայելին՝ նշելով, որ գրոհը ցույց է տալիս Իսրայելի «թուլությունն ու շփոթմունքը»։
Թեհրանում կայացած երթին մասնակցել են երկրի ղեկավարության ներկայացուցիչներ, այդ թվում՝ Անվտանգության խորհրդի քարտուղար Ալի Լարիջանին, արտգործնախարար Աբաս Արաղչին եւ Իրանի նախագահ Մասուդ Փեզեշքիանը: Զանգվածային ցույցերը տեղի են ունեցել Իրանի եւ Իսրայելի միջեւ շարունակվող ռազմական դիմակայության ֆոնին։
