Հյուսիսային Կորեայի առաջնորդ Կիմ Չեն Ընը պաշտոնապես Հարավային Կորեան հայտարարել է «ամենաթշնամական պետություն» և զգուշացրել սադրանքի դեպքում հետևանքների մասին: Այդ մասին հաղորդում է Կորեայի կենտրոնական լրատվական գործակալությունը (ԿԿԼԳ):
Նշվում է, որ 15-րդ գումարման Գերագույն ժողովրդական ժողովի առաջին նստաշրջանի վերջին՝ երկրորդ օրը նա հայտնել է, որ Հարավային Կորեան «պաշտոնապես ճանաչվել է ամենաթշնամական երկիրը»։ Նա հավելել է, որ Սեուլը կվճարի Փհենյանի նկատմամբ ցանկացած սադրանքի համար։
ԿԺԴՀ առաջնորդը հայտարարել է, որ իր երկրի՝ որպես միջուկային զենք ունեցող պետության կարգավիճակը երբեք չի փոխվի։
Նա խոստացել է ջանքեր գործադրել «թշնամական ուժերի» դեմ պայքարելու, Հյուսիսային Կորեայի «պաշտպանական միջուկային զսպումը» ամրապնդելու և իր միջուկային ուժերի կողմից ազգային ու տարածաշրջանային անվտանգության «ռազմավարական սպառնալիքներին» արագ և ճշգրիտ արձագանքին աջակցելու համար։
«Երկրի արժանապատվությունը, շահերը և վերջնական հաղթանակը կարող են երաշխավորվել միայն ամենահզոր ուժի կողմից», - ասել է Կիմ Չեն Ընը։
Գործակալությունը նաև հաղորդում է, որ Գերագույն ժողովրդական ժողովի նիստի ընթացքում քննարկվել է ԿԺԴՀ-ի Սահմանադրության վերանայման հարցը։
Միաձայն ընդունված օրինագծի համաձայն՝ Սահմանադրության մեջ փոփոխություններ և լրացումներ կկատարվեն, այդ թվում՝ «ԿԺԴՀ-ի սոցիալիստական Սահմանադրությունը» վերանվանելով «ԿԺԴՀ-ի Սահմանադրություն»։
Նիստում որպես օրակարգի վեցերորդ կետ քննարկվել է նաև պետական բյուջեի հետ կապված հարցը։
