Վաշինգտոնյան հանդիպումից հետո բանակցային գործընթացում տեղի են ունենում որոշակի խորը փոփոխություններ։ Հայաստանի իշխանությունները փորձում են լռել դրանց մասին, բայց դրանք ակնհայտ են դառնում հանրային միջոցառումների ժամանակ։ Այս մասին լրագրողների հետ զրույցում հայտարարել է «Պատիվ ունեմ» խմբակցության քարտուղար Տիգրան Աբրահամյանը՝ պատասխանելով Բաքվի կողմից շարունակվող հայատյացության մասին հարցին։
Որպես ապացույց՝ պատգամավորը մեջբերել է այն փաստը, որ Փաշինյանը վերջերս ստիպված էր հակարդարձել Ալիևին՝ արձագանքելով նրա հայտարարություններին։ «Մեկուկես ամիս փորձում են հասարակությանը համոզել, որ խաղաղությունը փաստ է։ Եթե փաստ է, ապա ինչպե՞ս է Ադրբեջանի նախագահը նույն բառապաշարն օգտագործում, ինչ մեկ և երկու տարի առաջ»,- նկատել է Աբրահամյանը՝ հավելելով, որ Վաշինգտոնի հանդիպման «արդյունքները» ամբողջությամբ ներկայացված չեն, կամ կան պայմանավորվածություններ և մոտեցումներ, որոնք վերաբերում են Հայաստանին և պարունակում են անորոշության մեծ աստիճան։ Այսինքն, ինչն անհրաժեշտ էր Ադրբեջանին, նա ստացավ, իսկ Հայաստանին վերաբերող հարցերը՝ գերիների, օկուպացված տարածքների և այլն, թողեցին հետոյի համար։ Նման պայմաններում Ադրբեջանը մեծացնում է ճնշումը և չպետք է մոռանալ Ալիևի ինքնասիրության մասին, նկատել է պատգամավորը։
«Այն, որ Ադրբեջանը շարունակում է խոսել ուժի դիրքերից և մեծացնում է ռազմական բյուջեն, ևս մեկ հանգամանք է, որը ցույց է տալիս, որ Հայաստանի վրա ճնշումը կմեծանա և պահանջները չեն դադարի, իսկ Ադրբեջանը կձգտի կորզել այն ամենը, ինչ կարող է»,— ընդգծել է պատգամավորը։ Նա կարծում է, որ «խաղաղություն» կոչվող փուչիկը գոյություն չունի։ «Մինչև ընտրությունները քիչ ժամանակ է մնացել, իսկ նրանց հաղթաթուղթը հասարակությանը «խաղաղություն» բառով թուղթ ներկայացնելն է»,- ասել է Աբրահամյանը։
Պատասխանելով այն հարցին, թե ինչու Փաշինյանը չի զանգում Թրամփին՝ Բաքվի բառապաշարի վերաբերյալ բողոքելու համար, պատգամավորը ենթադրել է, որ ՀՀ իշխանությունները կարող էին փորձել դա անել և ձեռնարկվածի անհաջողության պատճառով լռում են։ «Պետք է նաև հասկանալ, որ ԱՄՆ-ն շատ ավելի մեծ խնդիրներ ունի, Հայաստանը նրանց համար ամենօրյա զրույցի առարկա չէ։ Նրա մասին հիշում են, երբ խոսում են այն տարածաշրջանների մասին, որտեղ Թրամփը «լուծել է խնդիրները»։ Բայց եթե խոշոր երկրների համար 10 գյուղ կամ քաղաք էական չեն, ապա Հայաստանի համար դա իշխանության և անվտանգության հարց է, իսկ ՀՀ իշխանությունները ոչ միայն չեն լուծում հարցերը, այլև՝ թույլ են տալիս Ադրբեջանին շանտաժ կիրառել»։
Ինչ վերաբերում է Թրամփի՝ Հայաստանի և Ալբանիայի հետ կապված շփոթմունքին, պատգամավորը ենթադրել է, որ դա արտացոլում է նրա վերաբերմունքը Հայաստանի իշխանությունների նկատմամբ։ «Անկախ նրանից, թե որքան է Հայաստանը փորձում Վաշինգտոնում կայացած հանդիպումը ներկայացնել որպես պատմական իրադարձություն, այն կարող էր այդպիսին լինել Ադրբեջանի համար, բայց ոչ Հայաստանի համար», - նշել է պատգամավորը։
Խոսելով Թուրքիայի Անվտանգության խորհրդում Հայաստանի հետ հարաբերությունների քննարկման և այդ ուղղությամբ առաջընթացի հնարավորության մասին, Աբրահամյանը վստահություն է հայտնել, որ Թուրքիան փորձում է լրացուցիչ ճնշում գործադրել Հայաստանի վրա, որպեսզի Ադրբեջանի հետ համատեղ ուժերով նրան ստիպեն շարժվել իրենց ընտրած ճանապարհով։
44-օրյա պատերազմի հանգամանքները ուսումնասիրող հանձնաժողովի զեկույցի հետ կապված իրավիճակի վերաբերյալ պատգամավորը նշել է, որ, ամեն դեպքում, հնարավոր չի լինի պարզաբանել, թե ինչ է տեղի ունեցել ներկայիս կառավարության օրոք։
