Իտալիայի արտաքին գործերի նախարար և փոխվարչապետ Անտոնիո Տայանին հայտնել է, որ Բեյրութում իտալացի զինվորական հրահանգիչների կոնտինգենտը 100-ից կրճատվել է 15-ի։
«Բեյրութում մենք կրճատել ենք լիբանանյան զինվորականների ուսուցման մեջ ներգրավված մեր զորախումբը՝ 100-ից հասցնելով 15-ի», – ասել է նա Il Messaggero թերթին տված հարցազրույցում:
Նա նաև հիշեցրել է, որ իր վարչությունը բոլոր հայրենակիցներին հորդորում է լքել Լիբանանը իրավիճակի վատթարացման պատճառով։ Նախարարի խոսքերով՝ երկրում մշտական գրանցումով ապրում է մոտ 2 հազար իտալացի։
Միաժամանակ, Հռոմն անմիջական վտանգ չի տեսնում Լիբանանում ՄԱԿ-ի ժամանակավոր ուժերի կազմի մեջ գտնվող զորախմբի համար: Այս մասին հայտնում է Իտալիայի պաշտպանության նախարարությունը։ Տայանին ասել է, որ իսրայելական կողմից երաշխիքներ է ստացել Լիբանանում միջազգային զորախմբի անվտանգության ապահովման վերաբերյալ։