Պատերազմի ուսումնասիրման ամերիկյան ինստիտուտը (ISW) ռազմաճակատում տիրող իրավիճակի մասին իր վերջին զեկույցում վերլուծել է Ռուսաստանի Կուրսկի շրջանում Ուկրաինայի Զինված ուժերի գործողությունների առաջին արդյունքները։ Կազմակերպության փորձագետների կարծիքով՝ ցանկացած գնահատական այն մասին, թե ինչպես այս գործողությունը կազդի ռուս-ուկրաինական պատերազմի ընդհանուր ընթացքի վրա, դեռևս վաղաժամ է։
ISW-ն հիշեցնում է նախագահ Վլադիմիր Զելենսկու խոսքը, ով երեքշաբթի NBC-ին տված հարցազրույցում ասել էր, որ Ռուսաստանը մոտ 60 հազար զինծառայող է ուղղել Կուրսկի շրջան։ Ավելին, ընդամենը մի քանի օր առաջ Ուկրաինայի զինված ուժերի գլխավոր հրամանատար Ալեքսանդր Սիրսկին ասել էր, որ ռուսական հրամանատարությունը ստիպված է եղել Կուրսկ ուղարկել ավելի քան 30 հազար զինվոր։
Փորձագետների կարծիքով՝ Կուրսկի շրջանում ուկրաինացի զինվորականների գործողությունների հիմնական նպատակներից մեկն էր ստիպել ռուսական բանակին թուլացնել ռազմաճակատի մյուս հատվածները, այդ թվում՝ Պոկրովսկու ուղղությունը, որտեղ ռուսական ուժերը հաջողությամբ առաջ են շարժվում և ունեն զգալի առավելություն թե թվաքանակով, թե կրակի ուժով։
«Արդեն մի քանի շաբաթ է, ինչ ISW-ն նկատում է, որ ռուսական զորքերի հրամանատարությունը զորքեր է տեղափոխում Կուրսկի շրջան Խարկովի մարզի հյուսիսից և Կուպյանսկ-Սվատովո-Կրեմեննայա գծից, ինչպես նաև Զապորոժիեի շրջանի արևմուտքից։
Վերջերս տեղեկություններ կային, որ ռուսական հրամանատարությունը կարող է վերահղել ուժերը, որոնք նախկինում նախատեսված էին Պոկրովսկու ուղղությամբ ավելի կարևոր գործողությունների համար»,- գրում են ինստիտուտի փորձագետները:
Նույն հարցազրույցում Զելենսկին ասել է, որ Ուկրաինայի Զինված ուժերը մտադիր չեն լքել Կուրսկի շրջանը, ինչը նշանակում է, որ Ուկրաինան կվերահսկի այնտեղի տարածքը այնքան ժամանակ, քանի դեռ նախագահ Վլադիմիր Պուտինը չի որոշում այս տարածաշրջան տեղափոխել փորձառու և մարտունակ ստորաբաժանումներ, կարծում են ISW փորձագետները։
Նրանց կարծիքով, առայժմ Պուտինը փորձում է պահպանել Պոկրովսկի վրա ռուսական հարձակման տեմպերը և, հետևաբար, չի շտապում ազատագրել Կուրսկի շրջանը։
Ռուսաստանի նախագահը շարունակում է հավատալ, որ «Ռուսաստանը կարող է դանդաղ և անվերջ կլանել Ուկրաինան և առաջ շարժվել՝ ջախջախելով հակառակորդի զորքերը և հասնել իր նպատակներին քայքայման պատերազմի միջոցով», գրում է ISW-ն։
Պուտինը նաև ակնկալում է Ուկրաինային արևմտյան աջակցության աստիճանական թուլացում և դեռևս պատրաստ չէ որևէ բանակցություն վարել կապիտուլյացիայից բացի այլ պայմաններով, շարունակում է ինստիտուտը։
«Այս վաղ փուլում ուկրաինական ներխուժման հետևանքները գնահատելու փորձերը, հավանաբար, կհանգեցնեն թերի և ոչ ճիշտ եզրակացությունների Ուկրաինայի՝ հակամարտության հետագիծը փոխելու ունակության և ընդունելի պայմաններով խաղաղության բանակցություններ վարելու Կրեմլի պատրաստակամության վերաբերյալ», - եզրակացնում են զեկույցի հեղինակները.
Հիշեցնենք, որ նախկինում Ուկրաինայի զինված ուժերը մեկ անգամ չէ, որ զարմացրել են դիտորդներին Խարկովի մարզում և Խերսոնում հաջող հարձակումների ժամանակ։
