Իսրայելը կրկին հարվածել է Իրանի Նաթանզի միջուկային հարստացման կայանին։ Այս մասին հայտնում է The Associated Press-ը։
Իրանի պետական հեռուստատեսությունը և «Ֆարս» լրատվական գործակալությունը հաղորդել են հարվածի մասին՝ ցույց տալով, որ Իսրայելի հարձակումները շարունակվում են լուսաբացից մի քանի ժամ անց։
Պետական հեռուստատեսությունը նաև հաղորդել է Շիրազում և Թավրիզում տեղի ունեցած հարձակումների մասին։
Mehr գործակալությունը տեղեկացնում է, որ Իրանի Ատոմային էներգիայի կազմակերպության խոսնակ Բեհրուզ Քամալվանդին հաստատել է Նաթանզի օբյեկտի վրա հարձակումը։
«Բարեբախտաբար, մենք զոհեր չենք ունեցել, և մենք վնասի գնահատական չունենք։ Վնասի մեծ մասը մակերեսային է։ Ե՛վ Նաթանզը, և՛ Ֆորդոն գտնվում են գետնի տակ», - ասել է նա։
«Մենք նաև հայտարարություն տարածեցինք։ Աղտոտվածությունը, լինի դա քիմիական, թե ճառագայթային, զգացվել է տարածքի ներսում, իսկ դրսում այն չունենք։ Արտաքին աղտոտվածության համար անհանգստանալու կարիք չկա, բայց մենք պետք է որոշակի մաքրում կատարենք ներսում։ Ինչքան մենք տեղյակ ենք, վնասը սահմանափակվում է մակերեսով», - հավելել է նա։
Քամալվանդին նաև շեշտել է, որ Իսրայելի ագրեսիան չի ազդի Իրանի միջուկային ծրագիրը շարունակելու վճռականության վրա։
Իսրայելը գիշերը հարվածներ էր հասցրել Իրանում գտնվող տարբեր օբյեկտների և բնակելի շենքերի, այդ թվում՝ Նաթանզի միջուկային օբյեկտին։ Ատոմային էներգիայի միջազգային գործակալությունը հայտնել էր, որ Նաթանզի ուրանի հարստացման օգյեկտում ճառագայթման մակարդակի բարձրացում չի դիտվել։
