Իսրայելի պատվիրակությունը ժամանել է Դոհա, որից հետո սկսել է բանակցությունների փուլը հրադադարի մասին համաձայնագրի կնքման ուղղությամբ առաջընթացի շուրջ։ Այս մասին ՏԱՍՍ-ին հայտնել է Դմիտրի Գենդելմանը, ով Իսրայելի վարչապետ Բենիամին Նեթանյահուի գրասենյակի խորհրդականն է։
«Պատվիրակությունը ժամանել է Դոհա, և սկսվել են բանակցությունները»,- ասել է նա։ Հարցին, թե որն է ընթացիկ բանակցային փուլի սպասվող տեւողությունը, Գենդելմանը պատասխանել է, որ «նախատեսված է մեկ օր»։
«Միևնույն ժամանակ, անհրաժեշտության դեպքում, խորհրդակցությունները կարող են երկարաձգվել ևս մեկ-երկու օրով»,- հավելել է նա։
Ինչպես ավելի վաղ ՏԱՍՍ-ին հայտնել է Նեթանյահուի գրասենյակի խորհրդականը, իսրայելական պատվիրակությունը ամբողջ կազմով մեկնել է Կատար: Իսրայելցի բանակցողների թիմը գլխավորում է Մոսադի հետախուզության տնօրեն Դեյվիդ Բարնեան, ինչպես նաև ներառում է Գլխավոր անվտանգության ծառայության ղեկավար Ռոնեն Բարը, վարչապետի արտաքին հարաբերությունների հարցերով խորհրդական Օֆիր Ֆալկը և պատանդների փոխանակման համակարգող, պահեստազորի գեներալ-մայոր Նիցան Ալոնը։
Եգիպտոսի, Կատարի և ԱՄՆ-ի առաջնորդները օգոստոսի 9-ին համատեղ հայտարարություն են տարածել՝ կոչ անելով Իսրայելին և պաղեստինյան արմատական ՀԱՄԱՍ շարժմանը վերսկսել Գազայի հատվածում հրադադարի շուրջ բանակցությունները օգոստոսի 15-ին Դոհայում կամ Կահիրեում։
