Իսրայելի բանակի ստորաբաժանումները սահմանափակ նպատակաուղղված ցամաքային գործողություն են սկսել շիաների «Հեզբոլլահ» կազմակերպության դեմ Լիբանանի հարավում։ Այս մասին հաղորդում է Իսրայելի պաշտպանության բանակի (ԻՊԲ) մամուլի ծառայությունը։
«ԻՊԲ-ի ստորաբաժանումները նպատակաուղղված և սահմանափակ գործողություն են սկսել Լիբանանի հարավի շրջանում՝ ահաբեկիչներին հայտնաբերելու և ոչնչացնելու, ինչպես նաև «Հեզբոլլահ»-ի ենթակառուցվածքները վերացնելու նպատակով», - ասվում է Telegram-ում հրապարակված հայտարարության մեջ:
Ըստ ԻՊԲ-ի՝ այս գործողությունների նպատակն է ավելի ամրապնդել պաշտպանական դիրքերը՝ Իսրայելի հյուսիսի բնակիչների լրացուցիչ պաշտպանության համար։
Իսրայելի և «Հեզբոլլահ»-ի միջև ռազմական գործողություններ են սկսվել Իրանի դեմ փետրվարի 28-ին ԱՄՆ-ի և Իսրայելի կողմից մեկնարկած հակամարտության ֆոնին։ «Հեզբոլլահ»-ը հարվածներ է հասցրել Իսրայելին, իսկ Իսրայելի ռազմական գործողությունների հետևանքով Լիբանանում զոհերի թիվը գերազանցել է 390-ը։
