Իսպանիայի իրավապահ մարմինները ձերբակալել են 39 ենթադրյալ թալանչիների թագավորության հորդառատ անձրևների պատճառով հեղեղված շրջաններում։
«Ոստիկանությունը ձերբակալել է 39 մարդու՝ հանցագործության կանխարգելման հատուկ գործողության շրջանակում, որը մեկնարկել է առևտրի շրջաններում, որոնք առավելապես տուժած են փոթորկից»,-ասված է իրավապահ մարմինների X-ի (նախկին Twitter) հայտարարության մեջ: «Բազմաթիվ գողացված իրեր են հայտնաբերվել»:
Հոկտեմբերի 29-ին Իսպանիայի պետական օդերևութաբանական գործակալությունը խիստ եղանակային նախազգուշացում է տարածել երկրի տարբեր շրջաններում՝ առատ տեղումների պատճառով։ Թագավորության հարավում և արևելքում տեղումների պատճառով եղանակային վտանգի մակարդակը բարձրացվել է առավելագույնի։
Վալենսիայում ջրհեղեղների հետևանքով զոհվել է 92 մարդ, սակայն անհետ կորածների որոնումները դեռ շարունակվում են։ Իսպանիայի այլ շրջաններում վատ եղանակի զոհ է դարձել երեք մարդ։ Երկրի իշխանությունները հոկտեմբերի 31-ից նոյեմբերի 2-ը սուգ են հայտարարել փոթորկի հետևանքով զոհվածների համար։
Աղետի հետևանքների պատճառով տասնյակ ճանապարհներ դեռ փակ են։ Բացի դրանից, ըստ իշխանությունների, Մադրիդի և Վալենսիայի միջև երկաթուղային հաղորդակցության վերականգնումը ենթակառուցվածքներին հասցված լուրջ վնասների պատճառով կարող է տևել շուրջ երեք շաբաթ։
