Իրաքի վարչապետ Ալի Ֆալիհ ազ-Զայդին և ԱՄՆ պատերազմի նախարար Փիթ Հեգսեթը քննարկել են գործակցությունն անվտանգության ոլորտում և ամերիկյան զորքերի ներգրավումն Իրաքի զինված ուժերի պատրաստման գործում։ Այս մասին Իրաքի վարչապետը գրել է X հարթակում:
Նա նշել է, որ Հեգսեթը շնորհավորել է իրեն նոր կառավարություն կազմելու մանդատ ստանալու առթիվ։
«Քննարկվել են նաև երկկողմ հարաբերությունները տարբեր ոլորտներում, հատկապես՝ կապված անվտանգության ոլորտում գործակցության հետ՝ համաձայն Իրաքի և ԱՄՆ-ի միջև ռազմավարական համագործակցության շուրջ շրջանակային համաձայնագրի», - գրել է վարչապետը։
Ազ-Զայդին, որն ապրիլի վերջին դարձել է Իրաքի կառավարության ղեկավարը, ընդգծել է երկու երկրների միջև հատուկ հարաբերությունները։
«Զանգը հաստատեց երկու երկրների միջև հարաբերությունների յուրահատուկ բնույթը և դրանց վերաակտիվացման ուղղությամբ աշխատանքի կարևորությունը վարժանքների ոլորտում՝ Իրաքի զինված ուժերի կարողությունները բարելավելու և դրանց մարտունակության մակարդակը բարձրացնելու նպատակով», - հավելել է վարչապետը։
Ազ-Զայդին վարչապետ է ընտրվել այն բանից հետո, երբ ԱՄՆ նախագահ Դոնալդ Թրամփը հրապարակայնորեն սպառնաց դադարեցնել Իրաքին տրամադրվող օգնությունը, եթե կառավարության ղեկավար նշանակվի ավելի վաղ առաջադրված թեկնածու Նուրի ալ Մալիքին, որին ԱՄՆ-ն համարում է իրանամետ։
