Իրանը չի ձգտում միջուկային զենք ստեղծել, այլ, ընդհակառակը, պատրաստ է ամբողջությամբ վերադառնալ Գործողությունների համատեղ համապարփակ ծրագրի (ԳՀԾ) շրջանակներում ստանձնած պարտավորությունների կատարմանը։ Այս մասին Նյու Յորքում լրագրողների հետ կլոր սեղանի ժամանակ հայտարարել է Իսլամական Հանրապետության նախագահ Մասուդ Պեզեշքիանը։
«Մենք լիովին պատրաստ ենք վերադառնալ համաձայնագրով ստանձնած մեր պարտավորություններին, բայց չպետք է այնպես լինի, որ Միացյալ Նահանգները և եվրոպական երկրները, չցանկանալով կատարել իրենց պարտավորությունները, իրենց հերթին խնդրեն մեզ վերադառնալ մեր պարտավորություններին»,- մեջբերում է Պեզեշքիանին ISNA-ն։
Ինչպես ընդգծել է նախագահը, Իրանի ռազմական դոկտրինում միջուկային զենքի համար տեղ չկա։ «Մինչ որոշ երկրներ մեզ կեղծ մեղադրում էին միջուկային զենք ստեղծելու փորձի մեջ, Ատոմային էներգիայի միջազգային գործակալությունը (ԱԷՄԳ) ամենազգույշ դիտարկումն է անցկացրել Իրանում»,- ընդգծել է նա։
Իրանը բազմիցս ընդգծել է, որ երկիրը գերագույն առաջնորդ Ալի Խամենեիի ֆեթվա ունի այն մասին, որ միջուկային զենքի արտադրությունը հակասում է իսլամին: Իրանցի քաղաքական գործիչները դա նշում են որպես ազգային միջուկային ծրագրի բացառապես խաղաղ բնույթի փաստարկ։
