Իրանի ԱԳ նախարար Աբբաս Արաղչին երկուշաբթի երեկոյան իր թուրք գործընկեր Հաքան Ֆիդանի հետ հեռախոսազրույցում ասել է, որ Ստամբուլի քաղաքապետ Էքրեմ Իմամօղլուի ձերբակալության շուրջ Թուրքիայում ծավալվող իրադարձությունները ներքին խնդիր են, որը պատշաճ կերպով կլուծվի այդ երկրի իշխանությունների կողմից։
Երկու դիվանագետների միջև բանակցությունները տեղի են ունեցել այն ժամանակ, երբ Թուրքիայում անկարգությունների և բողոքի ցույցերի մեծ ալիք է բարձրացել՝ կապված կոռուպցիայի մեղադրանքով Ստամբուլի քաղաքապետ Էքրեմ Իմամօղլուի բանտարկության հետ:
«Մենք վստահ ենք, որ թուրքական իշխանությունները ճիշտ կկառավարեն այդ իրադարձությունները՝ ելնելով թուրք ազգի շահերից»,- ասել է Արաղչին։
Նախարարները քննարկել են նաև Արևմտյան Ասիայում զարգացումները, որտեղ լարվածությունը կրկին սրվել է Գազայի և Լիբանանի վրա Իսրայելի նոր հարվածների, Սիրիայի վրա հարձակումների և Եմենում ԱՄՆ օդային հարվածների ֆոնին:
Արաղչին դատապարտել է Իսրայելի գործողությունները Գազայի և Լիբանանի դեմ և կոչ է արել միջազգային հանրությանը, հատկապես իսլամական երկրներին, անհապաղ միջոցներ ձեռնարկել «օկուպացիոն ռեժիմի հանցագործությունները» դադարեցնելու համար։
Նա նաև դատապարտել է Եմենում ԱՄՆ-ի օդային հարվածները և ընդգծել տարածաշրջանի երկրների միջև համագործակցության կարևորությունը իսլամական երկրների դեմ հետագա ագրեսիան կանխելու և տարածաշրջանում անապահովության ու անկայունության վատթարացման համար:
Իր հերթին, Թուրքիայի արտգործնախարարն անդրադարձել է Արաբա-իսլամական նախարարների կոմիտեի նիստին, որին նա մասնակցել է կիրակի օրը Եգիպտոսի մայրաքաղաքում և «խորը մտահոգություն» հայտնել Գազայում հրադադարի խախտման կապակցությամբ։
«Ֆիդանը ասել է, որ իսլամական երկրները պետք է ակտիվացնեն ջանքերը՝ լուծելու Պաղեստինի հարցը և այն իրավիճակը, որում գտնվում է նրա ժողովուրդը։ Նա հայտարարել է, որ Թուրքիան պատրաստ է օգնել դիվանագիտական լուծումներ գտնել տարածաշրջանային և միջազգային խնդիրներին»,- գրում է իրանական լրատվամիջոցը։
