Իրանի արտաքին գործերի նախարար Հոսեյն Ամիր Աբդոլլահյանը Բեյրութ կատարած այցի շրջանակներում հանդիպել է շիական «Հեզբոլլահ» կուսակցության առաջնորդ Շեյխ Հասան Նասրալլայի հետ։
Ինչպես հաղորդում է Al Manar հեռուստաալիքը, բանակցությունների ընթացքում կողմերը քննարկել են իրավիճակը պաղեստինա-իսրայելական հակամարտության գոտում։ Զրուցակիցները «խորհրդակցել են նաեւ, թե ինչ դիրքորոշում պետք է որդեգրել» Պաղեստինյան ՀԱՄԱՍ խմբավորման կողմից Իսրայելի վրա հարձակումից հետո։
Ինչպես նշում է ТАСС-ը, նախօրեին Իրանի ԱԳՆ ղեկավարը Բեյրութ է ժամանել։ Ինչպես հայտնում է Al Wataniya-ն, օդանավակայանում նախարարին դիմավորել են ՀԱՄԱՍ-ի եւ Իսլամական ջիհադի ներկայացուցիչներ Ահմեդ Աբդել Հադին եւ Իհսան Աթայան։ Նույն օրն Աբդոլլահյանն այցելել է Բաղդադ, որտեղ բանակցություններ է վարել Իրաքի վարչապետ Մուհամմեդ ալ-Սուդանիի հետ։ Հանդիպման ընթացքում Աբդոլլահյանն ասել է, որ Իրանը կապ է պահպանում տարածաշրջանի մի շարք երկրների և միջազգային կազմակերպությունների հետ՝ Գազայի հատված մարդասիրական օգնություն ուղարկելու հարցով։
