Հյուսիսային Կորեայում բացվել է հիշատակի թանգարան՝ նվիրված Ուկրաինայի դեմ Ռուսաստանի կողմից կռվելիս զոհված կորեացի զինվորների հիշատակին։ Այս մասին հայտնում է Associated Press լրատվական գործակալությունը։
2025 թվականի ապրիլին Հյուսիսային Կորեան և Ռուսաստանը հայտարարել էին, որ իրենց զինվորները միասին են պայքարել՝ Ռուսաստանի Կուրսկի սահմանային շրջան Ուկրաինայի ներխուժումը հետ մղելու համար։ Երկու երկրները չեն բացահայտել, թե որքան հյուսիսկորեացի զինվոր է տեղակայվել, սակայն Հարավային Կորեայի հետախուզական ծառայությունը անցյալ տարի գնահատել է, որ Հյուսիսային Կորեան ուղարկել է մոտ 15,000 զինվոր, որոնցից 2000-ը զոհվել են։
Հյուսիսային Կորեայի կենտրոնական լրատվական գործակալությունը հայտնել է, որ թանգարանի բացման արարողությունը տեղի է ունեցել ապրիլի 26-ին Փհենյանում։ Արարողությանը մասնակցել են Հյուսիսային Կորեայի առաջնորդ Կիմ Չեն Ընը, Ռուսաստանի Պետդումայի խոսնակ Վյաչեսլավ Վոլոդինը և պաշտպանության նախարար Անդրեյ Բելոուսովը։
Արարողության ժամանակ իր ելույթում Կիմ Չեն Ընը հայտարարել է, որ զոհված հյուսիսկորեացի զինվորները կմնան որպես «կորեացի ժողովրդի հերոսության խորհրդանիշ»։ Նա գովասանքի խոսքեր է ասել հյուսիսկորեական և ռուսական զինված ուժերին՝ ռուս-ուկրաինական ճակատում ԱՄՆ-ի գլխավորած արևմտյան «հեգեմոնական դավադրությունը և ռազմական արկածախնդրությունը» խափանելու համար։
Ռուսաստանի նախագահ Վլադիմիր Պուտինը Կիմին ուղղված նամակում, որը Վոլոդինը կարդացել էր արարողության ժամանակ, ասել է, որ թանգարանը «անկասկած կդառնա երկու երկրների միջև բարեկամության և համերաշխության հստակ խորհրդանիշ»։
Բելոուսովի հետ առանձին հանդիպման ժամանակ Կիմ Չեն Ընը ասել է, որ Հյուսիսային Կորեան լիովին կաջակցի Ռուսաստանի քաղաքականությանը՝ պաշտպանելու իր ինքնիշխանությունը և անվտանգային շահերը։
Ռուսական ՏԱՍՍ-ի փոխանցմամբ, Բելոուսովը հայտարարել է, որ Ռուսաստանը պատրաստ է ստորագրել երկու երկրների միջև ռազմական համագործակցության ծրագիրը 2027-2031 թվականների համար։
