Հունգարիան հնարավոր է կալանավորի Իսրայելի վարչապետ Բենիամին Նեթանյահուին, եթե նա մուտք գործի Հունգարիայի տարածք այն ժամանակահատվածում, երբ գտնվում է Միջազգային քրեական դատարանի կողմից հետախուզման մեջ։ Այս մասին հայտարարել է Հունգարիայի նորընտիր վարչապետ Պետեր Մադյարը, հաղորդում է Politico-ն:
Հունգարիան նախկինում հրաժարվել էր ձերբակալել Իսրայելի առաջնորդին, երբ նա 2025 թվականի ապրիլին այցելել էր Բուդապեշտ, երբ վարչապետի պաշտոնում Նեթանյահուի հավատարիմ դաշնակից Վիկտոր Օրբանն էր։ Հանդիպումից առաջ Օրբանը հայտարարել էր ՄՔԴ-ից Հունգարիայի դուրս գալու մասին (մի գործընթաց, որն ուժի մեջ մտնելու համար տևում է մեկ տարի՝ համաձայն դատարանի կանոնադրության) և Նեթանյահուին անձեռնմխելիության երաշխիքներ էր տվել։
Մադյարը, սակայն, հայտարարել է, որ մինչև հունիսի 2-ը կդադարեցնի ՄՔԴ-ից դուրս գալու գործընթացը, ինչը կլինի Մոլդովայի կողմից ՄԱԿ-ի գլխավոր քարտուղարին դուրս գալու մասին պաշտոնական ծանուցում ներկայացնելուց ուղիղ մեկ տարի անց։
Լրագրողների հարցին, թե ինչ կնշանակի դա այս աշնանը նախատեսված Նեթանյահուի այցի համար, Մադյարն ասել է, որ եթե ՄՔԴ-ի կողմից հետախուզվող անձը մուտք է գործում մեր տարածք, ապա այդ անձը պետք է կալանավորվի:
«Ես դա հստակ հասկացրել եմ նաև Իսրայելի վարչապետին: «Տիսա» կառավարության հաստատակամ մտադրությունն է դադարեցնել սա և ապահովել, որ Հունգարիան մնա ՄՔԴ անդամ: Եթե երկիրը ՄՔԴ անդամ է, և ՄՔԴ-ի կողմից հետախուզվող անձը մուտք է գործում մեր տարածք, ապա այդ անձը պետք է կալանավորվի»։
Հիշեցնենք, որ ՄՔԴ-ն 2024 թվականի նոյեմբերին Նեթանյահուին ձերբակալելու օրդեր է տվել՝ ռազմական հանցագործությունների և մարդկության դեմ ուղղված հանցագործությունների մեղադրանքով։ ՄՔԴ անդամ երկրները, սկզբունքորեն, պարտավոր են կալանավորել այն անձանց, որոնց նկատմամբ նման օրդերներ են տրվել։
