Առնվազն 22 մարդ է զոհվել Մեն նահանգի Լյուիսթոն քաղաքում տեղի ունեցած հրաձգության հետևանքով, հայտնում է NBC News-ը։ Տուժել է 50-ից 60 մարդ։
Չորեքշաբթի ուշ երեկոյան նահանգի ոստիկանությունը ահազանգ է հրապարակել հրաձիգի մասին՝ կոչ անելով բնակիչներին մնալ տներում և ճանապարհներից դուրս, որպեսզի շտապօգնության մեքենաներն ազատ տեղաշարժվեն:
Լյուիսթոնի ոստիկանական բաժանմունքը Facebook-ում հրապարակել է կասկածյալի անունը՝ 40-ամյա Ռոբերտ Քարդ՝ ասելով, որ նա «զինված և վտանգավոր է»:
Ոստիկանությունն ավելի վաղ հրապարակել էր կասկածյալի երեք լուսանկար, ով, ըստ երևույթին, կրակ էր բացել կիսաավտոմատ հրացանից:
Անդրոսկոգին շրջանի շերիֆի գրասենյակը նաև հրապարակել է կասկածյալի լուսանկարները՝ մորուքավոր տղամարդու՝ շագանակագույն գլխարկով, բաճկոնով և ջինսով, հրացանը ձեռքին:
«Լյուիսթոնում ակտիվ հրաձիգ կա», - ավելի վաղ հայտնել էր Մեն նահանգի ոստիկանությունը X սոցիալական ցանցում: «Մենք մարդկանց խնդրում ենք պատսպարվել: Խնդրում ենք մնալ տանը՝ փակ դռներով։ Իրավապահ մարմիններն այս պահին մի քանի շրջաններում հետաքննություն են իրականացնում»:
The Sun Journal-ը, վկայակոչելով Լյուիսթոնի ոստիկանության ներկայացուցչին, հաղորդել է կրակոցների մասին երեք տարբեր հաստատություններում՝ Sparetime Recreation բոուլինգ-սրահում, Schemengees Bar & Grille ռեստորանում և Walmart բաշխման կենտրոնում:
Բոուլինգի դաշտը բարից մոտավորապես 6,5 կմ հյուսիս է, իսկ բաշխման կենտրոնը բարից մոտավորապես 2,5 կմ հարավ:
Մեն նահանգի կենտրոնական բժշկական կենտրոնը, որ գտնվում է Լևիսթոնում, հայտարարություն է տարածել, որում ասվում է, որ այն «արձագանքում է զանգվածային զոհերի զանգվածային կրակոցներին» և համակարգում է տարածքային հիվանդանոցների հետ՝ հիվանդներին ընդունելու համար:
Լյուիսթոնը գտնվում է Մենի ամենամեծ քաղաքից՝ Պորտլենդից 56 կմ հյուսիս։
Միջադեպի մասին տեղեկացվել է նախագահ Ջո Բայդենը, հայտնում է Reuters-ը։
