Հորդանանի կառավարությունը հայտարարել է, որ թույլ չի տա, որ երկիրը ռազմադաշտի վերածվի, հայտնել է Ֆրանսպրես գործակալությունը։
«Հորդանանի և հորդանանցիների պաշտպանությունը մեր առաջնային պարտականությունն է»,-տեղական լրատվամիջոցներին տված ասուլիսի ժամանակ հայտարարել է կառավարության խոսնակ Մոհամմադ Մոմանին:
Նրա խոսքերը հնչել են Իսրայելի ուղղությամբ Իրանը հրթիռներ արձակելուց հետո: Հորդանանը փակել է իր օդային տարածքը:
Մոմանին, ով նաև կառավարական կապի նախարարն է, հավելել է, որ հրթիռների մի մասն ընկել է թագավորության տարբեր շրջաններում, ինչի հետևանքով երեք մարդ թեթև վնասվածքներ է ստացել։
Միևնույն ժամանակ, թագավորության հանրային անվտանգության վարչությունը հայտարարություն է տարածել, որում նշվում է, որ «Հորդանանի թագավորական օդուժը և հակաօդային պաշտպանության համակարգերը արձագանքել են Հորդանանի օդային տարածք ներխուժած մի քանի հրթիռների և անօդաչու թռչող սարքերին»:
