Ուսումնական նոր տարին Հայաստանի պետական տնտեսագիտական համալսարանում սկսվում է դասադուլով: Համալսարանի մի շարք ուսանողներ հավաքվել են մուտքի դիմաց՝ տարատեսակ պաստառներով: Վերջիններս աջակցում են ՀՊՏՀ ռեկտորի արդեն նախկին ժամանակավոր պաշտոնակատար Ռուբեն Հայրապետյանին: Ուսանողները պնդում են՝ Հայրապետյանի հեռացումը համալսարանի համար խնդրահարույց է լինելու, քանի որ նա «ոչ թե խոսում էր, այլ՝ գործում»:
Հիշեցնենք՝ օգոստոսի 21-ին Հայաստանի պետական տնտեսագիտական համալսարանի ռեկտորի ժամանակավոր պաշտոնակատար Ռուբեն Հայրապետյանն ազատվել է պաշտոնից:
Ուսանողները դասադուլի հայտարարության մեջ նշել էին.
«ՀՊՏՀ ուսանողները շարունակում են պայքարել հանուն արդարության, այս անգամ արդեն դասադուլի միջոցով։ ՀՊՏՀ նախկին ռեկտորի ժ/պ Ռուբեն Հայրապետյանի կողմից ներդրված բարեփոխումների գործընթացի ընդհատման պայմաններում բուհի ուսանողները հրաժարվում են մասնակցել հին, ժամանակավրեպ մեթոդներով կազմակերպվող ուսումնական գործընթացին։ Նոր ուսումնական տարին չի կարող մեկնարկել ուսանողների ձայնը լռեցնելու պայմաններում։
ՀՊՏՀ ուսանողների բողոքի ակցիան ուղղված է բուհում տեղի ունեցող կամայականությունների դեմ: Ուսանողները դասադուլի միջոցով փորձելու են լսելի դարձնել իրենց ձայնը, աջակցությունը հայտնել ընդհատված բարեփոխումներին, բարեփոխումները նախաձեռնած թիմին և թույլ չտալ, որ բարեփոխումների անվան տակ ուսանողների անտեղյակ հատվածին մանիպուլացնեով՝ շարունակվի կամայականությունների ու կոռումպացված համակարգի արատավոր շղթան։
Դասադուլի ժամանակ ունենալու ենք մամուլի պատասխանատուներ, ովքեր կպատասխանեն Ձեր բոլոր հարցերին և կներկայացնեն շարժումն ու նպատակն ամբողջությամբ և ճշգրիտ»:
