Հայաստանն աշխատում է Լոգիստիկայի և տրանսպորտի տարածաշրջանային ինտեգրման (TRIPP) նախագծի շրջանակներում նոր միջազգային ներդրողներ ներգրավելու ուղղությամբ։ Սա պայմանավորված է այն մտավախությամբ, որ Իրանի և Պարսից ծոցի շուրջ սրվող իրավիճակը կարող է շեղել ԱՄՆ-ի ուշադրությունը։ Հայաստանի հիմնական նպատակն է ապահովել այս առանցքային ենթակառուցվածքային նախաձեռնության կայուն իրականացումը, գրում է Eurasianet-ը։
Ինչպես նշում է պարբերականը, Երևանն ակտիվացնում է TRIPP նախագծում մասնակցության ընդլայնման ուղղությամբ կատարվող աշխատանքները։ Այս տրանսպորտային միջանցքը դիտարկվում է որպես երկրի ապագա տնտեսական ենթակառուցվածքի հիմնական տարրերից մեկը։ Հայաստանի իշխանությունները փաստում են, որ ԱՄՆ-ի հետ երկկողմ համաձայնագիրն առաջընթաց է ապրում, սակայն նախագիծը պետք է մասնակիցների ավելի լայն կազմ ունենա։
TRIPP նախագիծը 42 կիլոմետր երկարությամբ երթուղի է Սյունիքի մարզում, որը պետք է կապի Ադրբեջանը Նախիջևանի հետ և դառնա Կենտրոնական Ասիան Եվրոպային կապող «Միջին միջանցքի» լոգիստիկ համակարգի բաղկացուցիչ մասը։
Ըստ Eurasia View-ի տվյալների՝ Հայաստանը դիտարկում է Մերձավոր Արևելքի երկրների և Ղազախստանի ներգրավման հնարավորությունը։ Մասնավորապես, քննարկվում է տրանսպորտային և ենթակառուցվածքային կապերի զարգացման մեջ Աստանայի մասնակցությունը, ինչպես նաև առևտրային շղթաներում հայկական տարանցիկ երթուղիների օգտագործումը։
Առանձնակի նշվում է, որ ԱՄՆ-ն վերահաստատում է իր հետաքրքրվածությունը նախագծի իրականացման հարցում և հայտարարում դրա առաջնահերթության մասին՝ չնայած տարածաշրջանային ճգնաժամերին, այդ թվում՝ Իրանի շուրջ ստեղծված իրավիճակին։
