Մեր երեխաները մեր հույսն են և մեր պայծառ ապագայի երաշխիքը։ Այս մասին սեպտեմբերի 22-ին Ազգային ժողովում հայտարարեց ՀՀ աշխատանքի և սոցիալական հարցերի նախարար Արսեն Թորոսյանը՝ «Երեխաների իրավունքների պաշտպանությանը վերաբերող և ներկայումս շրջանառության մեջ գտնվող օրինագծերի էությունը» թեմայով խորհրդարանական լսումների ժամանակ։
Նրա խոսքով՝ մեծահասակները երեխաների աչքերում պետք է տեսնեն ոչ թե անօգնականությունն ու վախը, այլ անվերջ հնարավորությունները, անսասան վստահությունը։ «Հենց այդ նպատակով է, որ պետական և կառավարական մարմինները երեխաների իրավունքների պաշտպանությունը պահում են իրենց ուշադրության կենտրոնում։ Եվ նրանք կշարունակեն իրականացնել այս քաղաքականությունը», - ասաց Թորոսյանը։
Նախարարը շեշտեց, որ երեխաների պաշտպանությունը պարզապես սոցիալական քաղաքականության մաս չէ։ Այն ՀՀ սոցիալ-տնտեսական զարգացման, անկախության, անվտանգության և բարգավաճ ապագայի հիմքն է։ Նա մասնավորապես թվարկեց այն քայլերը, որոնք կառավարությունը ձեռնարկել է ՀՀ տարբեր մարզերում՝ երեխաների իրավունքների պատշաճ պաշտպանությունն ապահովելու համար։
Իր հերթին, ՀՀ մարդու իրավունքների պաշտպան Անահիտ Մանասյանը ընդգծեց առկա խնդիրներն ու մարտահրավերները, որոնք, ըստ նրա, բազմաթիվ են Հայաստանում։ Խոսքը, մսնավորապես, համակարգային խնդիրների մասին է։ Դրանց թվում Մարդու իրավունքների պաշտպանը նշեց երեխաների նկատմամբ բռնության դեպքերին պատշաճ և ժամանակին արձագանքի բացակայությունը: «Երեխաների նկատմամբ բռնության բազմաթիվ դեպքեր կան՝ թե՛ ընտանիքում, թե՛ դրանից դուրս», - նշեց Մանասյանը։
Միևնույն ժամանակ, նա նշեց, որ հասարակությունն ինքն է այս հարցին մի փոքր այլ կերպ է նայում: Օրինակ, տարածված է այն կարծիքը, որ երեխաների իրավունքների պաշտպանության ապահովման հարցում պարզապես խնդիրներ չկան:
