Կոալիցիայի փլուզումից և Ազատ դեմոկրատական կուսակցությունից երեք նախարարների հրաժարականից հետո Գերմանիայի քաղաքացիների մեծամասնությունը պաշտպանում է Բունդեսթագի արտահերթ ընտրությունների անցկացման գաղափարը։
Bild թերթի պատվերով INSA սոցիոլոգիական ինստիտուտի անցկացրած հարցման համաձայն՝ հարցվածների 57%-ը ցանկանում է որքան հնարավոր է շուտ ընտրել նոր խորհրդարան։
Ընդամենը 22%-ն է աջակցում մարտին ընտրություններ անցկացնելու կանցլեր Օլաֆ Շոլցի ծրագրին, մինչդեռ 12%-ը կարծում է, որ ընտրությունները պետք է անցկացվեն մինչև 2025 թվականի սեպտեմբեր նախապես սահմանված վերջնաժամկետը։
Կոալիցիայի փլուզումը հավանության է արժանացել հարցվածների գրեթե երկու երրորդի կողմից. 64%-ը կողմ է այս քայլին, և միայն 22%-ն է դժգոհություն հայտնել:
Միևնույն ժամանակ, գերմանացիները կոալիցիայի փլուզման համար հիմնականում մեղադրում են կոալիցիայի բոլոր երեք առաջնորդներին. այդպես է կարծում հարցվածների 34%-ը։ 27%-ը մեղադրում է կանցլեր Օլաֆ Շոլցին, 25%-ը՝ Ազատ դեմոկրատական կուսակցության ղեկավար Քրիստիան Լինդներին և միայն 7%-ը՝ էկոնոմիկայի նախարար Ռոբերտ Հաբեկին՝ Կանաչների կուսակցությունից։
Նոյեմբերի 7-ին Գերմանիայի ֆինանսների նախարար և Ազատ դեմոկրատական կուսակցության առաջնորդ Քրիստիան Լինդները պաշտոնապես հրաժարական է ներկայացրել, ինչը նշանավորել է իշխող կոալիցիայի փլուզումը։
Գերմանիան այժմ կառավարվում է փոքրամասնության կառավարության կողմից, որը կազմված է սոցիալ-դեմոկրատների և կանաչների ներկայացուցիչներից:
Տարաձայնությունների պատճառով իշխող կոալիցիան չի կարողացել համաձայնության գալ 2025 թվականի երկրի բյուջեի շուրջ։ Լինդները Շոլցին մեղադրել է կոալիցիան միտումնավոր ցրելու համար։
Նշենք, որ Գերմանիայի նախագահ Ֆրանկ Վալտեր Շտայնմայերը հայտարարել է, որ պատրաստ է Բունդեսթագը լուծարել և արտահերթ խորհրդարանական ընտրություններ անցկացնել, եթե պատգամավորներն անվստահություն հայտնեն երկրի կանցլեր Օլաֆ Շոլցին։
