Գազայի հատվածում պատերազմի սկզբից ի վեր զոհված լրագրողների թիվը հասել է 238-ի։ Այս մասին հայտնում է Al Jazeera-ն՝ վկայակոչելով Գազայի կառավարության մամուլի ծառայությանը։
«Մենք խստորեն դատապարտում ենք պաղեստինցի լրագրողների համակարգված սպանությունն իսրայելական օկուպացիոն ուժերի կողմից։ Կոչ ենք անում միջազգային հանրությանը դատապարտել և զսպել օկուպացիոն ուժերի հանցագործությունները և հետապնդել նրանց միջազգային դատարաններում»,- նշվել է կառավարության հայտարարության մեջ։
Իրանի արտաքին գործերի նախարարություն դատապարտել է Գազայում լրագրողների վրա հարձակումը։
«Լրագրողների վրա հարձակումներն արգելված են ցանկացած հանգամանքներում, և նրանց թիրախավորելը ռազմական հանցագործություն է»,- ասվում է հայտարարության մեջ։
Թուրքիայի նախագահի աշխատակազմի հաղորդակցության վարչությունը հայտարարել է, որ Գազայի հատվածում Al Jazeera-ի լրագրողների ուղղակի թիրախավորումն իսրայելական բարբարոսական արարք է։ Ընդգծվել է, որ Իսրայելը լրագրողներին թիրախավորում է՝ աշխարհին թույլ չտալու համար տեսնել իր կողմից իրականացվող ցեղասպանությունը։
Լրագրողների թիրախավորումն անընդունելի է համարել նաև Նորվեգիայի արտաքին գործերի նախարարը։
«Լրագրողների վրա միտումնավոր հարձակումը հարձակում է խոսքի ազատության դեմ»,- նշել է նախարարը։
ՄԱԿ-ի գլխավոր քարտուղարի մամուլի խոսնակ Ստեֆան Դյուժարիկն իր հերթին նշել է․ «Ցանկացած վայրում լրատվամիջոցների աշխատակիցները պետք է կարողանան ազատորեն կատարել իրենց աշխատանքը՝ առանց թիրախավորվելու»։
Իսրայելական վերջին հարձակման հետևանքով Գազայի հատվածում զոհվել է Al Jazeera հեռուստաալիքի 5 աշխատակից:
