ԱՄՆ նախագահի թեկնածուներ Քամալա Հարիսը եւ Դոնալդ Թրամփը միասին ծախսել են ռեկորդային՝ 3,5 մլրդ դոլար իրենց ընտրարշավների վրա՝ 2024թ. ընտրությունները դարձնելով ամենաթանկը ԱՄՆ պատմության մեջ։ Այս մասին գրել է Financial Times թերթը։
Թերթը նշել է, որ հավաքվել է մոտ 4,2 մլրդ դոլար, ներառյալ կուսակցական կոմիտեների եւ արտաքին խմբերի մուծումները։
Ինչպես գրում են լրագրողները, Հարիսը կարողացել է ավելի շատ միջոցներ գրավել, քան Թրամփը՝ հավաքելով ավելի քան 2,3 մլրդ դոլար Դեմոկրատական ազգային կոմիտեի, սուպերխմբերի եւ այսպես կոչված Super Pacs-երի միջոցով, որոնք կարող են անսահմանափակ նվիրատվություններ ստանալ ֆիզիկական անձանցից։ Այդ գումարից ծախսվել է արդեն 1,9 մլրդ դոլար։
Թրամփի թիմը հավաքել է 1,8 մլրդ դոլարից մի փոք ավելի, որոնցից ծախսվել է 1,6 մլրդ դոլար։
Նշվել է, որ այդ բոլոր միջոցների մոտ կեսը ծախսվել է գովազդի վրա, հատկապես յոթ նահանգներում, որոնք համարվում են առանցքային ընտրություների արդյունքների համար։
Հարիսի ընտրարշավը ծախսել է ավելի քան 1 մլրդ դոլար գովազդի վրա այդ նահանգներում, մինչդեռ ընդհանուր ծախսերը գովազդի համար վճռական շրջաններում կազմել են մոտ 1,5 մլրդ դոլար։ Մասնավորապես, միայն Փենսիլվանիայում, որտեղ ընտրողների 19 ձայն կա, ծախսվել է ավելի քան 400 մլն դոլար։
Թրամփի ընտրարշավի բյուջեի զգալի մասը հատկացվել է իրավաբանական ծախսերին՝ կապված Թրամփի դատավարությունների հետ։ Ինչպես հավաստիացնում են լրագրողները, դրա վրա ծախսվել է ավելի քան 100 մլն դոլար, ինչը կազմում է բոլոր ծախսերի 14 տոկոսը։
Այդ ծախսերը մասամբ ծածկվել են ի հաշիվ կուսակցության եւ սուպերխմբերի, ինչպիսին է Իլոն Մասկի ֆինանսավորած America Pac-ը, որի համար նա նվիրաբերել է մոտ 118 մլն դոլար։
