Գերմանիայի կանցլեր Ֆրիդրիխ Մերցը և Ֆրանսիայի նախագահ Էմանուել Մակրոնը համաձայնության են եկել իրենց երկրների համագործակցության «նոր գլխի» շուրջ։ Պետությունների ղեկավարները այս մասին հայտարարել են Մակրոնի ամառային նստավայրում՝ Լազուրյան ափին գտնվող Ֆորտ դը Բրեգանսոնում հանդիպումից հետո։
Ֆրանսիայի նախագահը շեշտել է, որ ֆրանս-գերմանական հարաբերությունների «հաջող վերագործարկումը» կարող է դառնալ Եվրամիության ամրապնդման շարժիչ ուժ։ «Ես կարծում եմ, որ գերմանա-ֆրանսիական զույգն այսօր իդեալականորեն միավորված է՝ տնտեսական, առևտրային և դրամավարկային ոլորտներում ավելի ուժեղ Եվրոպա կառուցելու, բայց նաև այնպիսի Եվրոպա ստեղծելու համար, որը կհաստատի իր աշխարհաքաղաքական դիրքը Ռուսաստանի կողմից Ուկրաինայում սկսված պատերազմում, և այնպիսի Եվրոպա ստեղծելու համար, որը կընդունի այդ մարտահրավերները և կորոշի վերազինվել՝ իր պաշտպանությունն ապահովելու համար», - նշել է Մակրոնը։
Մերցը, իր հերթին, Գերմանիան և Ֆրանսիան անվանել է Եվրամիության «առանցք» և ընդգծել, որ եթե բոլոր 27 անդամ պետությունները միավորվեն, ԵՄ-ն «դառնում է գործոն աշխարհում՝ տնտեսական, քաղաքական և անվտանգության ոլորտում»։ «Գերմանիան և Ֆրանսիան կենտրոնական դեր են խաղում այս Եվրամիությունում, այս եվրոպական մայրցամաքում», - ասել է Մերցը, հաղորդում է DW-ն։
