Տասնյակ հազարավոր ՀՀ քաղաքացիներ, մասնավորապես նաև Երևան քաղաքի բնակիչներ, էական դժվարություններ են ունենում փաստացի բնակության վայրի վերաբերյալ տեղեկանք ստանալու հետ կապված։ Այս մասին այսօր՝ մարտի 25-ին, ԱԺ նիստում հայտարարեց «Հայաստան» խմբակցության պատգամավոր Թադեւոս Ավետիսյանը՝ դիմելով ՆԳ փոխնախարար Արմեն Մկրտչյանին:
«Ես վերջերս իմ օրինակով փորձեցի խնդիրը ավելի մանրամասն պարզել։ Այսինքն, նախ այդ տեղեկանքը տալիս է ՏԻՄ-ը, օրինակ, վարչական շրջանը, հետո պարզվում է, որ վարչական շրջանը այդ տեղեկանքը տալու համար ասում է՝ գնա հարևաններիցդ հայտարարություններ բեր, ասենք չորս-հինգ հարևանից հայտարարություն բեր, որ դու այդ գրանցված հասցեում փաստացի բնակվում ես։ Աբսուրդ է, որովհետև այդ տեղեկանքը նախ նպատակի առումով ոչինչ է, որովհետև այդ գրել-ստորագրելը դեռ ոչինչ չի նշանակում: հետո հասկանալի չէ, եթե մարդը հայտարարություն է տալիս, որ այդտեղ է ապրում, ինչի՞ չեք հավատում, ասենք պիտի գնա ինչ-որ տեղեկանքներ հավաքի:
Այս թվայնացման աշխարհում դուք չեք տիրապետո՞ւմ այդ բազաներին կամ եթե ճշտելու խնդիր կա, ի վերջո ոստիկանություն կա, համայնքային ոստիկանություն կա, լիքը ծառայություններ կան, թող գնան, զբաղվեն»,-ասաց նա:
Ի պատասխան փոխնախարարն ասաց. ««Եթե չեմ սխալվում, փաստացի հաշվառման վերաբերյալ տեղեկանքը անձնագրային ծառայություններն են տալիս և այստեղ թվային բազաներ չկան և չեն կարող լինել, քանի որ անձինք հաշվառվում են մի հասցեում և դա է թվանացված և դատաբազայում առկա է, բայց այլ հասցեներում քաղաքացին, ըստ էության, ազատ է բնակվելու:
Մենք այս պրոցեսն արագացնելու համար թվային գործիք ենք ստեղծել, որը անձնագրային ծառայության և համայնքային ոստիկանության տարածքային բաժնի օպերատիվ կապն է ապահովում, որպեսզի արագ պարզվի անձի փաստացի բնակվելը տվյալ հասցեում: Շատ արագ մատչելի մենք սպասարկում ենք քաղաքացիներին այս առումով»:
Ընդդիմադիր պատգամավորը հակադարձեց, որ այդ տեղեկանքը տալիս է վարչական շրջանը եւ ինքը երկու առաջ է այդ տեղեկանքը վերցրել. «Երկրորդը, դուք շատ արագ և արդյունավետ չեք սպասարկում, ես իմ օրինակով եմ ասում: Այդպիսի տեղեկանք ամենատարբեր տեղերից պետք են, բանկից մինչև վայենկոմատ: Իրականում, այն լուծումը, որով դուք հիմա առաջնորդվում եք, ոչինչ չի տալիս։ Այսինքն, այդ հարևանի տված հայտարարությունը ոչ մի բան է և հետո, ձեր իշխանությունն էր չէ՞ ասում, ինչու պիտի քաղաքացուն դուք չհավատաք, եթե հայտարարություն է տալիս ՀՀ քաղաքացին, որ այդտեղ է ապրում, ինչի չեք հավատում, ասում եք գնա, կամայական չորս-հինգ հարևանից հայտարարություն բեր։ Սա է աբսուրդը և սա ժամ առաջ, օր առաջ լուծում է պահանջում»,- հայտարարեց Թադեւոս Ավետիսյանը:
Փոխնախարար Մկրտչյանն էլ ասաց, որ չի հասկանում, թե ինչ տեղեկանքի մասին է խոսքը. «Եթե հնարավոր է՝ ներկայացեք, ես հասկանամ ինչի մասին է խոսքը, որ պատշաճ կարողանամ ձեզ պատասխանել»:
