Հայաստանի երեք հիմնական ընդդիմադիր ուժերն ունեն վարչապետի մեկ միասնական թեկնածու՝ երկրորդ նախագահ Ռոբերտ Քոչարյանը։ Այս մասին ապրիլի 14-ին լրագրողների հետ զրույցում հայտարարել է Ազգային ժողովի փոխնախագահ, «Քաղաքացիական պայմանագիր» խմբակցության անդամ Ռուբեն Ռուբինյանը։
Ըստ նրա՝ «ռուսաստանցի օլիգարխը» (այսպես է նա անվանել «Ուժեղ Հայաստան» կուսակցության առաջնորդ Սամվել Կարապետյանին) չի կարող լինել վարչապետի թեկնածու, իսկ «Բարգավաճ Հայաստան» կուսակցության ղեկավար Գագիկ Ծառուկյանը հայտնել է, որ չի հավակնում այդ պաշտոնին։ Ռուբինյանը հավելել է, որ «Բարգավաճ Հայաստանը» ընտրություններին մասնակցում է վարչապետի «թաքնված» թեկնածուով։ «Ընդ որում, նրանց ցուցակի երկրորդ համարը Անդրանիկ Թևանյանն է, ով 2021 թվականի ընտրություններում պատգամավոր էր դարձել «Հայաստան» դաշինքի ցուցակով։ Նույն ցուցակում են նաև «Հայաստան» դաշինքի պատգամավոր Էլինար Վարդանյանը, դաշինքի նախկին պատգամավոր Արեգնազ Մանուկյանը և այլն», — նշել է Ռուբինյանը։
Նա ընդգծել է, որ «Ուժեղ Հայաստան» կուսակցության ցուցակի երկրորդ համարը Քոչարյանի փաստաբան Արամ Վարդևանյանն է, ով 2021 թվականին նույնպես պատգամավոր էր դարձել «Հայաստան» դաշինքի կազմում։
Խորհրդարանականը կոչ է արել Սամվել Կարապետյանին հրաժարվել Ռուսաստանի և Կիպրոսի քաղաքացիությունից։ Նա կասկածի տակ է դրել այն հանգամանքը, որ Կարապետյանը ընտրվելու դեպքում կկարողանա «ուժեղ» բանակցություններ վարել արտասահմանյան գործընկերների հետ։ Ռուբինյանն ասել է, որ Սամվել Կարապետյանի խոսելու ունակությունը կասկածի տակ է և հարց է տվել, թե ինչպե՞ս է նա բանակցություններ վարելու։
