ԱՄՆ նախագահ Դոնալդ Թրամփն առաջին արտասահմանյան այցի շրջանակում Սաուդյան Արաբիայում հանդիպել է Սիրիայի նոր ղեկավար Ահմեդ Ալ Շարաայի հետ: Հանդիպմանը միացել են նաև Սաուդյան Արաբիայի թագաժառանգ Մուհամեդ բեն Սալմանը և Թուրքիայի նախագահ Ռեջեփ Թայիփ Էրդողանը: Ի դեպ, վերջինս հանդիպմանը միացել է տեսակապի միջոցով, հայտնում է Anadolu լրատվական գործակալությունը:
Նախօրեին Թրամփը հայտարարել էր Սիրիայի դեմ պատժամիջոցները չեղարկելու մտադրության մասին։
«Ես կհրամայեմ վերացնել Սիրիայի նկատմամբ պատժամիջոցները՝ նրանց հնարավորություն տալու համար», - ասել էր նա Սաուդյան Արաբիա կատարած այցի ժամանակ։
Թրամփը պարզաբանել էր, որ համապատասխան որոշում է կայացրել Սաուդյան Արաբիայի գահաժառանգ արքայազն Մուհամմեդ բեն Սալման Ալ Սաուդի և Թուրքիայի նախագահ Ռեջեփ Թայիփ Էրդողանի հետ իրավիճակը քննարկելուց հետո։
Դամասկոսը ողջունել էր պատժամիջոցները չեղարկելու Թրամփի հայտարարությունը։
